प्रतिनिधिसभा विघटन सदर भए नेपाल ठूलो राजनीतिक भुमरीमा फस्ने नेकपा अध्यक्ष प्रचण्डको चेतावनी

खोज पत्रिका मङ्लबार, २०७७ माघ २७, २० :५१ बजे

काठमाडौं । नेपाल कम्युनिस्ट पार्टी (नेकपा) का अध्यक्ष पुष्पकमल दाहाल प्रचण्डले प्रतिनिधिसभा विघटन गर्ने सरकारको निर्णय सदर भए नेपाल ठूलो राजनीतिक भुमरीमा फस्ने बताएका छन् । नेपालबाट अन्तर्राष्ट्रिय सञ्चारमाध्यमका लागि काम गर्दै आएका पत्रकारहरूसँग मंगलबार काठमाडौंमा भएको भेटमा प्रचण्डले बाहिर सुन्नमा आएजस्तै सेटिङअनुसार नै निर्वाचन आयोग र सर्वोच्च अदालतको निर्णय आयो भने मुलुक ठूलो राजनीतिक भुमरीमा फस्ने चेतावनी दिएका हुन् ।

उनले यद्यपि, आफूहरू संविधानको अक्षर र भावनाअनुसार नै न्यायालयबाट निर्णय आउनेमा विश्वस्त रहेको बताए । अध्यक्ष प्रचण्डले संवैधानिक र अलोकतान्त्रिक ढंगले संविधान मिचिसकेपछि त्यसको मातहतमा आयोजना हुने निर्वाचन पनि असंवैधानिक र अवैधानिक हुने जिकिर गरे । उनले प्रधानमन्त्री ओली आफैँले प्रतिगमन गरेर आफैँ प्रतिगमनविरुद्ध सभा आयोजना गर्नु आश्चर्यजनक रहेको टिप्पणी गरे । प्रधानमन्त्रीले निरंकुश ढंगले आफ्नो शासन अवधि लम्ब्याउन खोजेको र त्यो पूरा नहुने ठोकुवा उनको थियो ।