संसद विघटनविरुद्धको सुनाई आज,सबै रिट प्रधानन्यायाधीशको बेन्चमा

खोज पत्रिका बुधबार, २०७७ पुस ८, १६ :४३ बजे

काठमाडौं । संसद विघटनविरुद्ध परेका सबै रिटको सुनुवाई आज हुँदैछ । प्रधानन्यायाधीश चोलेन्द्र शम्शेर राणाको एकल इजलासमा रिटहरूको प्रारम्भिक सुनुवाइ सुरु भएको हो । संसद विघटन असंवैधानिक भएको दाबीसहित सर्वोच्च अदालतमा परेका सबै १२ वटा रिट प्रधानन्यायाधीश चोलेन्द्र शमशेर जबरा आफैंले हेर्न लागेका हुन् । राणाले आफ्नै इजालसमा सुनुवाइका लागि पेसी तोकेका हुन् ।

प्रधानमन्त्री केपी शर्मा ओलीले यही पुस ५ गते प्रतिनिधिसभा भंग गरी आगामी बैशाख १७ र २७ गते मध्यावधि निर्वाचन गर्न गरेको सिफारिस राष्ट्रपति विद्यादेवी भण्डारीले सोही दिन सदर गरेकी थिइन् । संसद विघटन असंवैधानिक भएको दाबीसहित राष्ट्रपति र प्रधानमन्त्रीसमेतलाई विपक्षी बनाइ सर्वोच्चमा १२ वटा रिट दायर भएका छन् ।

रिट दायर गर्नेहरुमा नेकपा संसदीय दलका प्रमुख सचेतक देव गुरुङ, वरिष्ठ अधिवक्ता दिनेश त्रिपाठी, कन्चनकृष्ण न्यौपाने, लोकेन्द्रबहादुर ओली, समृत खरेल, ज्ञानेन्द्रराज आरण, शालिकराम सापकोटा, कमल खत्री, मणिराम उपाध्याय, अमिता गौतम पौडेल, दीपक राई र तुलसी सिंखडा छन् ।

नेकपाका सांसदहरूले दिएको निवेदनसहित सबै रिटमा एकैपटक सुनुवाइ हुन लागेको हो। संसद् विघटन विरुद्ध नेकपाका सांसदले मंगलबार रिट दर्ता गराएका थिए । रिटमा प्रधानमन्त्री केपी ओली, राष्ट्रपति विद्यादेवी भण्डारी र सभामुख अग्निप्रसाद सापकोटालाई विपक्षी बनाइएको छ ।