नेकपा अध्यक्ष प्रचण्ड फकाउन दिनभर दौडधुप

खोज पत्रिका शुक्रबार, २०७७ कार्तिक १४, १९ :३१ बजे

काठमाडौं । सत्तारुढ दल नेकपा अध्यक्षद्धयको सम्वाद टुटेपछि प्रधानमन्त्री केपी शर्मा ओली निकट नेताहरुले पुष्पकमल दाहाललाई फकाउने प्रयास तीब्र पारेका छन् । कार्यकारी अध्यक्ष दाहालले ओलीसँग भेटन नमानेपछि ओली निकट नेताहरुले दाहाललाई फकाउने प्रयास गरेका हुन् । आज पनि ओलीले परराष्ट्रमन्त्री प्रदीपकुमार ज्ञवालीलाई खुमलटार पठाइएका थिए । ज्ञवाली पछिल्लो तीन दिनमा खुमलटार पुग्ने प्रधानमन्त्री एवं पार्टी अध्यक्ष केपी शर्मा ओली निकट तेस्रो नेता हुन् ।

यसअघि बुधबार संसदीय दलका उपनेता सुवास नेम्वाङ र अर्थमन्त्री एवं पार्टी महासचिव विष्णु पौडेल र बिहीबार प्रदेश ५ का मुख्यमन्त्री शंकर पोखरेल पुगेका थिए । नेताहरुले प्रधानमन्त्री एवं पार्टी अध्यक्ष ओलीसँग सम्वाद गर्न आग्रह गर्दै आएका छन् । दाहालले भने आफू कन्ट्याक्ट ट्रेसिङमा परेकाले बालुवाटार नजाने जवाफ दिँदै आएका छन् ।

कात्तिक ४ मा नेकपाका अध्यक्षद्वय ओली–दाहालबीच कर्णाली विवाद समाधानबारे लामै कुरा भएको थियो । तर आफूसँग भएको सहमति विपरीत ओलीले निर्णय लिएको भन्दै दाहालले भेटवार्ताको निम्तो अस्वीकार गर्दै आएका छन् ।

क्याटेगोरी : प्रमुख समाचार, ब्रेकिंग न्युज, राजनीति, समाचार
ट्याग : #केपी शर्मा ओली