रुकुम सोती हत्याकाण्डः पोष्टमार्टम रिपोर्ट बाहिरिएपछि आन्दोलन,प्रहरीद्धारा हवाई फायर

खोज पत्रिका मङ्लबार, २०७७ असार २, ०० :४३ बजे

काठमाडौं । रुकुमपश्चिमको चौरजहारी ८ सोतीमा ६ जनाको ज्यान जाने गरी भएको हत्याकाण्डको पोष्टमार्टम रिपोर्ट बाहिरिएपछि जाजरकोटमा आन्दोलन चर्किएको छ । जाजरकोटमा भएको पोष्टमार्टम रिर्पोट बाहिरिएपछि भएको आन्दोलनमा प्रहरीले लाठी चार्ज गर्दा नवराज विककी आमा उर्मिला घाइते भएकी छन ।

सोमबार दिउँसो जिल्ला अस्पतालले मृतक नवराज विकसहित ६ जनाकै पोष्टमार्टम रिर्पोट सार्वजनिक गरेको थियो । पोष्टमार्टममा उनीहरुको नदीमा हाम फाल्दा ज्यान गएको भनेपछि पीडितहरु आक्रोशित बनेका थिए । एकाएक पीडितहरुको आक्रोश आन्दोलनमा परिवर्तन हुँदा जिल्ला प्रहरी कार्यालय घेराउ भएको थियो । प्रहरी कार्यालयमा नाराबाजी र प्रदर्शन बढेपछि प्रहरीले शुरुमा लाठीचार्ज गरेको थियो । लाठी चार्जका क्रममा नवराजकी आमा उर्मिला बिकको हातमा चोट लागेको छ ।

नवराजकी आमासहित अन्य ब्यक्तीहरु पनि घाइते भएका छन । प्रहरीले स्थितिलाई नियन्त्रणमा लिन चार राउण्ड हवाई फायर गरेको थियो भने केही सेल अश्रुग्यास समेत प्रहार गरेको थियो । जेठ १० गते रुकुम पश्चिम सोतीमा प्रेमिका शुष्मा मल्ललाई लिन गएका नवराजसहित ६ जना युवाको हत्या भएको थियो । प्रहरीले हत्या गर्ने ३४ जनाविरुद्ध जिल्ला अदालत रुकुम पश्चिममा आजीवन जन्मकैदको माग गर्दै मुद्दा चलाएको छ । ५ जना भने अझै फरार छन ।

गृहमन्त्रालयको प्रतिबेदन सार्वजनिक
सरकारले जातीय विभेदका घटना दोहोरिन नदिने र रुकुम पश्चिम घटनाको दोषीमाथि कानूनी कारवाही गर्न संवेदनशील रहेको जनाएको छ । गृह मन्त्रालयका सहप्रवक्ता उमाकान्त अधिकारीले आज प्रेस विज्ञप्ति जारी गरी पीडकलाई सजाय र पीडितलाई न्याय दिने कानूनी प्रक्रिया प्रारम्भ भइसकेको जनाएका छन् । उनले सो घटनाका सम्बन्धमा विस्तृत छानबिन तथा अनुसन्धानपछि न्यायिक निरुपणका लागि अभियोजन भइसकेको जनाएका छन् । उनले मृतकको परिवार तथा घाइतेलाई मनासिव क्षतिपूर्ति भराउन अदालतमा माग दाबी भई पीडकलाई सजाय र पीडितलाई न्याय दिने कानूनी प्रक्रिया प्रारम्भ भइसकेको बताए । घटनाका सम्बन्धमा गृह मन्त्रालयद्वारा गठित छानबिन समितिले घटनाका सम्बन्धमा विस्तृत छानबिन गरी दोषीलाई कानूनबमोजिम कारबाही हुन सिफारिश गरेको छ ।