दोलखामा शिवाकोटीको घरदैलो अभियान, मतदाताको राय लिँदै आफ्ना योजना सुनाउँदै

खोज पत्रिका मङ्लबार, २०८२ माघ २०, २१ :४४ बजे

चरीकोट । नेपाली कांग्रेसका दोलखा प्रतिनिधि सभा सदस्य उम्मेदवार अजयबाबु शिवाकोटीले भीमेश्वर नगरपालिकाको वडा नम्बर ७ मा घरदैलो गरेका छन् । मंगलबार बिहानैदेखि कार्यकर्तासहित चुनावी मैदानमा निस्किएका उनले मकैबारीका स्थानीयसँग भेटघाट गर्दै प्रल्हाद बस्नेतको सप्ताह कार्यक्रममा पुगेर आशीर्वादसमेत लिएका छन् । बाटोमा सर्वसाधारणसँग कुरा गर्दै उनले पुरानो १२ नम्बर वडाका केही भाग र वडा नम्बर १ को क्षमावती क्षेत्रमासमेत पुगेर मत मागेका छन् ।

शिवाकोटीले आफू जनताको सच्चा प्रतिनिधि भएर दोलखाको मुहार फेर्न चुनावी मैदानमा आएको र विजयी भएपछि सधैँ जनताकै सुखदुःखमा साथ दिने प्रतिबद्धता जनाएका छन् । उनले यस पटक ुसिँचाइ र माटोको गुणवत्ताु लाई पनि जोड दिएका छन् ।

हामी सक्छौँ, परिवर्तन सम्भव छू भन्ने नाराका साथ उनले दोलखाको समग्र आर्थिक र सामाजिक विकासका एजेन्डाहरू जनतामाझ लैजाने बताएका छन् । भ्रष्टाचार विरोधी अभियान र पत्रकारिताको पृष्ठभूमिबाट आएका कारण उनीप्रति विशेषगरी युवा पुस्ताको आकर्षण बढी देखिएको छ।

दोस्रो दिनको घरदैलो कार्यक्रममा शिवाकोटीलाई समानुपातिक उम्मेदवार छिरिङ डोल्मा शेर्पाले पनि साथ दिएकी थिइन्। ठूलो सङ्ख्यामा उपस्थित स्थानीय नेता तथा कार्यकर्ताहरूको साथले उनको चुनावी अभियानमा थप उत्साह थपेको छ ।

उनी आगामी निर्वाचनअघि जिल्लाका सबै टोल र बस्तीमा पुगेर मतदाताको राय लिने र आफ्ना योजनाहरू सुनाउने तयारीमा छन् । दोलखाको विकासका लागि नयाँ सोच र जोस भएको नेतृत्व आवश्यक रहेको भन्दै उनले आफूलाई जिताउन सबैमा अनुरोध गरेका छन् ।

शिवाकोटीले भीमेश्वर नगरपालिकाको वडा नम्बर ५ बाट सोमबारदेखि शुरू गरेको मतदाता भेटघाट कार्यक्रमलाई अहिले तीव्र पारेका हुन् । पहिलो दिन उनले किरणछाया, बोक्सिला र विष्णुटोलमा पुगेर स्थानीय बासिन्दासँग प्रत्यक्ष संवाद गरेका थिए ।

आफ्नै गाउँठाउँका शिक्षित युवालाई उम्मेदवारका रूपमा पाउँदा स्थानीय बासिन्दाले खुशी व्यक्त गरेका छन् । घरदैलोका क्रममा मतदाताले उनलाई भव्य स्वागत गर्दै दोलखाको विकास र स्थानीय समस्याहरू समाधान गरिदिन आग्रह गरेका छन् ।

क्याटेगोरी : जनगुनासो, प्रमुख समाचार, राजनीति, विचार/लेख, समाचार