मधेशको बजेटमा असन्तुष्टि भएको सीके राउतको गुनासो, तत्कालै सरकार नछोड्ने

खोज पत्रिका आइतवार, २०८२ असार १५, ०३ :१७ बजे

काठमाडौं । जनमत पार्टीका अध्यक्ष डा। सीके राउतले मधेश प्रदेशको बजेटप्रति असन्तुष्टि रहे पनि तत्कालै सरकार नछाड्ने स्पष्ट पारेका छन् ।

शनिबार सप्तरीको बलान बिहुल गाउँपालिकामा कृषि विद्युतीकरण योजनाको अवलोकन गर्न पुगेका उनले पार्टीले कृषक हितमा दीर्घकालीन योजना ल्याएको, तर ती योजनाहरू बजेटबाट हटाइएकाले असन्तुष्टि व्यक्त गर्नु परेको बताएका हुन् ।

‘जनमत पार्टी जनताको पक्षमा उभिने पार्टी हो । कृषकसहित जनताको भलाइ हुने दीर्घकालीन योजना ल्याएका थियौं’, उनले भने, ‘तर तीमध्ये धेरैजसो योजना बजेटबाट हटाइए । त्यसैले हामी असन्तुष्ट भएका हौं, तर अहिल्यै सरकार छाड्ने निर्णय गरेका छैनौं ।’

अध्यक्ष राउतले संघीय लोकतान्त्रिक मोर्चा संविधान संशोधनको एजेन्डामा केन्द्रित ‘लुज एलायन्स’ मात्रै भएको औंल्याए । उनले भने, ‘कोही दल सरकारमा जाने कि नजाने, समर्थन दिने कि फिर्ता लिने भन्ने विषय मोर्चामा औपचारिक रूपमा छलफल भएको छैन ।

मोर्चाको मूल उद्देश्य संविधान संशोधनकै लागि दबाब सिर्जना गर्नु हो ।’ उनले संविधान संशोधनबारे मोर्चाभित्र लगातार छलफल भइरहेको जानकारी दिए । भोलि पनि मोर्चाको बैठक बस्ने र थप छलफलपछि साझा रणनीति तय हुने उनको भनाइ छ ।

क्याटेगोरी : अर्थ, जनगुनासो, प्रमुख समाचार, राजनीति, विचार/लेख, समाचार, सामाजिक सञ्जाल