माओवादीले राजीनामा माग्दा लेखा समिति सभापतिको बचाउमा उत्रियो एमाले–कांग्रेस

खोज पत्रिका मङ्लबार, २०८१ पुस ९, ०३ :१५ बजे

काठमाडौँ । सत्ता गठबन्धनका प्रमुख दल नेपाली कांग्रेस र नेकपा एमालेका सांसदहरु सार्वजनिक लेखा समितिका सभापति ऋषिकेश पोखरेलको बचाउमा उत्रिएका छन् । सोमवार प्रतिनिधिसभाअन्तर्गतको सार्वजनिक लेखा समितिको बैठकमा एमाले सांसद योगेश भट्टराईले समिति सभापति पोखरेलको बचाउ गर्दै आरोपित सभापति पत्नी अञ्जला कोइरालाले न्यायिक निरूपणलाई अदालतमा उपस्थित भएर सघाउनुपर्ने बताएका हुन् ।

उनले सभापतिबारे उठेका प्रश्नको जवाफ दिने ठाउँ समिति नभए पनि स्पष्ट बनाउँदा राम्रो हुने बताए । सचिव भट्टराईले हाल रहेको सत्ता गठबन्धन २०८४ सालसम्मै जाने दावी गरे । उनले विगतमा रहेको राजनीतिक परिस्थितिअनुसार संसदको पदाधिकारीबारे सहमति भएको बताए ।

कांग्रेस सांसद राजेन्द्र केसीले श्रीमतीले गल्ती गर्दा श्रीमान फस्ने हुन् कि भन्ने ठूलो चिन्ता रहेको बताए । उनले श्रीमतीले गल्ती गर्दा श्रीमान फस्ने हुन् कि हैन कानूनले के भन्छ भन्दै चिन्ता व्यक्त गरे । सांसद केसीले लेखा समिति सभापति ऋषिकेश पोखरेलको बचाउ समेत गरे । उनले सभापतिको श्रीमतीको पक्राउ पुर्जी जारी भएको तर सभापतिलाई नभएको भन्दै सभापतिलाई यसमा मुछ्नु राम्रो नभएको बताए ।

एमाले सांसद गोकुल बाँस्कोटाले समिति सभापतिप्रति व्यक्तिगत रुपमा आरोप–प्रत्यारोप लगाउन नहुने बताए । उनले अदालतबाट आरोप पुष्टि नभई सभापतिमाथि आरोप लगाएर प्रश्न उठाउनु जायज नभएको बताएका थिए ।

कांग्रेसका प्रमुख सचेतक श्याम घिमिरेले विगतमा रहेको राजनीतिक परिस्थितिअनुसार संसदको पदाधिकारीबारे भएको राजनीतिक सहमतिका आधारमा सभापति चयन भएकाले बारम्बार सभापतिमाथि प्रश्न उठाउनु जायज नभएको बताएका थिए ।

समिति सभापति ऋषिकेश पोखरेलले नीतिगत रूपमा आफूमाथि उठेका विषयमा विभिन्न ठाँउमा जवाफ दिन तयार रहेको बताए । उनले कानूनी प्रक्रियामा रहेका विषयको सबै परीक्षामा समावेश हुन आफू तयार रहेको उल्लेख गरेका थिए ।