खाजा खाने समय आधा घण्टाभन्दा बढी नराख्न निर्देशन

खोज पत्रिका आइतवार, २०८१ भदौ २३, २२ :२५ बजे

काठमाडौं । सरकारले सरकारी कार्यालयहरुमा खाजा खाने समय आधा घण्टाभन्दा बढी नतोक्न निर्देशन दिएको छ ।

प्रधानमन्त्री तथा मन्त्रिपरिषदको कार्यालयले मन्त्रालय, आयोग, सचिवालय र निकायहरुलाई परिपत्र गर्दै खाजा समय दिउँसो १ः३० देखि २ बजेसम्म मात्रै छुट्याएर कार्यान्वयन गर्न निर्देशन दिएको हो ।

२०८० पुस १२ गतेको मन्त्रिपरिषदको निर्णय अनुसार २०८० माघ २९ गतेमा प्रकाशित राजपत्रले सबै सरकारी कार्यालयको खाजा सयम तोकेकाले त्यसअनुसासर नै गर्न पत्रमा भनिएको छ ।

मन्त्रिपरिषदको निर्णयअनुसार तोकिएको खाजा समयबारे सूचना सूचनापाटीमा टाँस्ने र अन्य समयका सेवा प्रवाह र कार्यालयको काम नरोक्ने व्यवस्था गर्न सम्बिन्धकत कार्यालय प्रमुखले मिलाउनुपर्ने परिपत्रमा उल्लेख छ ।

पत्रमा अनुगमनका क्रममा कतिपय निकायमा खाजा समय तोकिएभन्दा बढी निर्धारण गरिएको र खाजा समय पालना नभएको प्रधानमन्त्री कार्यालयले जनाएको छ ।