नरबहादुरजस्तो अभिभावक पाएर क्रान्ति गर्न सजिलो भयोः प्रधानमन्त्री प्रचण्ड

खोज पत्रिका सोमवार, २०८१ बैशाख १०, १६ :१६ बजे

काठमाडौं । प्रधानमन्त्री पुष्पकमल दाहाल प्रचण्डले स्व. नरबहादुर कर्माचार्य जस्ता निष्ठावान् अभिभावक पाएकाले आफूलाई क्रान्तिको बाटो रोज्न सजिलो भएको बताएका छन् । सोमबार नरबहादुर कर्माचार्य स्मृति प्रतिष्ठानको तेस्रो वार्षिक केन्द्रीय सभालाई सम्बोधन गर्दै माओवादी केन्द्रका अध्यक्षसमेत रहेका प्रधानमन्त्री प्रचण्डले उनको योगदान र प्रेरणाको स्मरण गरेका हुन् ।

उनले पुराना पीढीका निष्ठावान् नेताकै कारण आफूहरू कम्युनिस्ट एकता हुनुपर्छ भनेर लागिरहेको बताए । उनले यसअघि गरिएको कम्युनिस्ट एकता विविध कारणले नटिके पनि एकपटक असफल भयो भन्दैमा त्यसबाट पछि हट्न नहुने बताए ।

दिवङ्गत कर्माचार्यले विसं २००५ देखि प्रजातन्त्र सङ्घमा आबद्ध भएर राणाविरोधी आन्दोलन र मजदुर आन्दोलनमा सशक्त भूमिका निर्वाह गरेको उल्लेख गर्दै प्रधानमन्त्री प्रचण्डले नेपाल कम्युनिस्ट पार्टी स्थापना गर्ने चार जना संस्थापकमध्ये एक भएको स्मरण गरे । प्रधानमन्त्री प्रचण्डले देश र जनताको पक्षमा निरन्तर क्रियाशील नरबहादुर कर्माचार्य देशकै राजनीतिक अभिभावक भएको बताए ।

चिनियाँ जनक्रान्ति र भारतको तेलङ्गाना किसान विद्रोहबाट प्रेरित कर्माचार्यले कम्युनिस्ट पार्टीको गठनपश्चात् मजदुर सङ्गठन स्थापना गरेको प्रधानमन्त्री प्रचण्डले जानकारी दिए । उनले मजदुर आन्दोलनको उत्थानका निम्ति निरन्तर सक्रिय कम्युनिस्ट नेता कर्माचार्यले पार्टी र जनप्रतिनिधिको भूमिका सँगसँगै पूरा गरेको बताए ।