सर्बोच्च अदालतमाथि प्रश्न उठाउने को हुन् रवि लामिछानेका समर्थक ?

खोज पत्रिका शनिबार, २०७९ माघ १४, १९ :०८ बजे

काठमाडौं । सर्बोच्च अदालतले रवि लामिछानेको सांसद, मन्त्री र राष्ट्रिय स्वतन्त्र पार्टीको अध्यक्ष समेत पद जाने गरी शुक्रबार फैसला गरिदियो । नागरिकता पुनः प्राप्तीका लागि लामिछानेले प्रक्रिया अघि नबढाएकै कारण उनी अनागरिक बने ।

गृहमन्त्रालयबाट निष्किदै गर्दा अदालतको आदेश पूर्ण रुपमा मान्ने र अदालत भन्दा ठूलो कोही पनि नहुने रवि लामिछानेले बताएका थिए । तर, उनै रविको पक्षमा भन्दै अदालतको अवहेलना हुनेगरी केही ब्यक्तीहरुले काठमाडौंको माइतीघरमा प्रर्दशन गरेका छन् ।

सर्वोच्च अदालतको आदेशले पदमुक्त भएका निवर्तमान उपप्रधान तथा गृहमन्त्री रवि लामिछानेको समर्थनमा माइतीघरमा प्रर्दशन के का लागि गरिएको हो भन्ने जवाफ समेत अधिकांश सहभागिहरुलाई पत्तै थिएन ।

पुकार बम, तारा बराल, शोम शर्मा लगायतका समर्थकहरुले माइतीघरमा प्रदर्शन गरेका हुन । उनीहरुले लामिछानेको पक्षमा नारा लगाएका थिए ।

अझ् प्रदर्शनमा सहभागीहरुले रवि लामिछानेलाई सुनियोजित रुपमा फसाइएको आरोप लगाएका थिए । सर्बोच्च अदालतले गरेको फैसलामाथि नै प्रश्न उठाउने गरी गरिएको प्रर्दशनलाई स्वयम् रवि लामिछानेले किन रोक्न सकेनन् भन्ने प्रश्न समेत उब्जिएको छ ।