‘हनिट्रयाप’ मा पारेर पाँच करोड बार्गेनिङ गर्ने मुख्य योजनाकार जेल चलान

खोज पत्रिका बुधबार, २०७९ पुस २७, १३ :५९ बजे

काठमाडौं । दाङ तुलसीपुरका एक व्यक्तिलाई ‘हनिट्रयाप’ मा पारेर पाँच करोड माग्ने मुख्य योजनाकार कृष्णी गहतरा पुर्पक्षका लागि कारागार चलान भएकी छिन् । थुनछेक बहसपछि दाङ देउखुरी जिल्ला अदालतका जिल्ला न्यायाधीश रामप्रसाद बस्यालको एकल इजलासले जेल चलानको आदेश दिएको हो ।

गढवा–६ घर भइ हाल तुलसीपुर बस्दै आएकी ३५ वर्षीया अनुष्का सिंह भनेर चिनिने गहतरासँगै तुलसीपुर–१८ ग्वारखोला निवासी ३६ वर्षीया कृष्णीकुमारी बस्नेतलाई समेत एक लाख धरौटी तिर्न नसकेपछि कारागार चलान गरिएको छ । आपराधिक लाभ मुद्दा चलाइएका घोराही–१० नारायणपुरका २७ वर्षीय रुद्रबहादुर केसी एक लाख धरौटीमा छुटेका छन् ।

प्रहरीले तीनै जनालाई पक्राउ गरेर मुद्दा चलाएको थियो । ‘ब्ल्याकमेलिङ’ गर्दै मोटो रकम नदिए बलात्कार मुद्दा हाल्ने धम्की दिँदै यी तीन जनाको समूहले पाँच करोड माग गरेको थियो । पटक–पटक गरी यो समूहले ३० लाख लगिसकेको समेत खुलेको थियो ।

पीडित पुरुषले मुख्य योजनाकार सिंहलाई ‘स्कुटरको लाइसेन्स’ र दुईवटा नागरिकता बनाउन सहयोग गरेको समेत खुलेको छ । पीडित भनिएका तुलसीपुरका व्यवसायी विरुद्ध समेत सरकारी कागज कीर्ते गरेको अभियोगमा मुद्दा चलाइएको छ । पक्राउ परेका खड्कालाई भने साधारण तारेखमा छाडिएको छ ।

क्याटेगोरी : जनगुनासो, देश/दुनियाँ, प्रमुख समाचार, समाचार
ट्याग : #पाँच करोड