किरण चेमजोङले खेल मैदानमै गरे प्रेमिकासँग ‘ईंगेजमेन्ट

खोज पत्रिका मङ्लबार, २०७९ साउन १७, १७ :३४ बजे

काठमाडौं । नेपाली राष्ट्रिय फुटबल टिमका पूर्वकप्तान गोलकिपर किरण चेमजोङले खेल मैदानमै प्रेमिकासँग ईंगेजमेन्ट गरेका छन् । सोमबार माल्दिभ्सको फुटबल मैदानमै उनले आफ्नी प्रेमिका कञ्चन निरौलालाई औंठी लगाइदिएर ईंगेजमेन्ट गरेका हुन ।

किरणले मैदानमै औठी लगाएको भिडियो फेसबुकमार्फत सार्वजनिक गरेका छन् । सोमबार माल्दिभ्सको धिवेही प्रिमियर लिगको फाइनल थियो । लिगको उपाधि किरण आवद्ध क्लब माजिया स्पोर्ट एण्ड रिक्रएसनले जित्यो । किरण प्रतियोगिताकै उत्कृष्ट गोलकिपर बने ।

त्यही खुसीयालीसँगै उनले आफ्नो टिमको साथमा प्रेमिकालाई विवाह प्रस्ताव गरेका थिए । चेमजोङ कञ्चनसँग लामो समयदेखि प्रेममा थिए । टिमको अगाडि नै किरणले यसरी प्रेम दर्शाउँदा कञ्चन निकै लजाएकी थिइन् । सोमबारको प्रस्तावले उनको प्रेमले औपचारिकता पाएको छ ।