जसपाको आरोपः सांसद प्रमोद साहमाथि एमाले कार्यकर्ताले आक्रमण गरे

खोज पत्रिका शनिबार, २०७८ चैत्र १२, १७ :४२ बजे

काठमाडौं । जनता समाजवादी पार्टीले प्रमुख सचेतक तथा संघीय सांसद प्रमोद साहमाथि नेकपा एमालेका कार्यकर्ताले आक्रमण गरेको आरोप लगाएको छ ।जसपाका केन्द्रीय कार्यालय प्रमुख प्रकाश अधिकारीले विज्ञप्ति जारी गरेर आक्रमण एमाले कार्यकर्ताले गरेको आरोप लगाएका हुन् ।

कामको सिलसिलामा गृह जिल्ला पुगेका सांसद साह र अन्य कार्यकर्ताहरूमाथि नेकपा एमालेका कार्यकर्ताहरूले सुनियोजित ढङ्गबाट आक्रमण गरी घाइते बनाएको विज्ञप्तिमा उल्लेख गरिएको छ । एमालेले यस्ता घृणित र आपराधिक क्रियाकलाप बन्द नगरे यसबाट उत्पन्न हुने परिणामको जिम्मेवार स्वयं हुने समेत जसपाले चेतावनी दिएको छ ।

घटनाका दोषीमाथि अविलम्ब कडाभन्दा कडा कारबाही गर्न तथा शान्ति सुरक्षाको प्रत्याभूति हुने गरी काम गर्न नेपाल सरकारसँग जसपाले माग गरेको छ ।क्लबको जग्गाको विषयमा दुई पक्षबीच भएको झडपमा सांसद साह, उनका सुरक्षा गार्ड र जसपाका केही कार्यकर्ता घाइते भएका छन् । सांसद साहको टाउको फुटेको छ । उनलाई उपचारका लागि हेलिकप्टरबाट काठमाडौं ल्याइएको छ ।