नारायणहिटी प्रकरणः भेषनारायण दाहाल र बतासलाई कारबाही गर्न अख्तियार र प्रहरीलाई पत्र

खोज पत्रिका बिहिबार, २०७८ पुस २९, ०४ :०१ बजे

काठमाडौं । संस्कृति पर्यटन तथा नागरिक उड्डयन मन्त्रालयले भेषनारायण दाहाल र बतास समूहका सञ्चालकमाथि छानविन र कारबाही गर्न अख्तियार दुरुपयोग अनुसन्धान आयोग र नेपाल प्रहरीलाई पत्र लेखेको छ । नारायणहिटी दरबार संग्रहालय तथा गणतन्त्र स्मारक व्यवस्थापन तथा सञ्चालन विकास समितिको कार्यकारी निर्देशकबाट राजिनामा दिएका भेषनारायण दाहाल र बतास समूहको बी म्यानेजेन्टका संचालकमाथि छानबीन र कारबाही गर्न अख्तियार दुरुपयोग अनुसन्धान आयोग र नेपाल प्रहरीलाई पत्र लेखेको हो ।

तत्कालिन कार्यकारी निर्देशक दाहालको मिलेमतोमा नारायणहिटी दरबार संग्रहालय परिसरको भवन र जग्गा क्याफ्टेरिया सञ्चालनका लागि बतास समूहलाई सस्तो दरमा ठेक्कामा दिएको आरोप छ । मन्त्रालयकाका अनुसार, नारायणहिटी दरबार संग्रहालय परिसरमा क्याफ्टेरिया संचालनसम्बन्धी अध्ययन तथा छानबिन प्रतिवेदनसहित मन्त्रालयले निवर्तमान कार्यकारी निर्देशक दाहाल र बतास समूहको बी म्यानेजेन्टका संचालकलाई मुलुकी अपराध संहिता २०७४ को दफा १४७ अनुसार कारबाहीका लागि पत्र लेखी पठाएको हो ।

यस संहिताले राष्ट्रिय तथा सार्वजनिक सम्पदा पूर्वस्वीकृतीबिना अतिक्रमण, भोगचलन गर्न नपाइने भनेको छ । यो कसुर प्रमाणित भएमा कसुर गर्ने वा गराउने व्यक्तिलाई तीन वर्षसम्म कैद वा तीस हजार रुपैयाँ जरिवाना वा दुवै सजाय हुन सक्ने भनेको छ । बतास समूहले त्यस क्षेत्रमा नयाँ संरचना बनाएपछि यो विवाद बाहिर आएको हो । मन्त्रालयले गठन गरेको छानबीन समितिले दाहालले अधिकारभन्दा बाहिर गएर बतास समूहसँग सम्झौता गरेको प्रतिवेदन बुझाएको थियो ।

बतास समूहले सम्झौताभन्दा बढी करीब १४ रोपनी जग्गामा पूर्व स्वीकृति बीना संरचना निर्माण गर्दा पनि दाहालले नारायणहिटी संग्रहालय परिसरको सम्पत्तिको संरक्षणमा जिम्मेवारी पूरा नगरेको छानबीन समितिको ठहर छ । छानबीन समितिले प्रतिवेदन बुझाएको भोलिपल्टै दाहालले कार्यकारी निर्देशकबाट राजीनामा दिएका थिए । तर मन्त्रालयले भने उनको राजीनामा स्वीकृत नगर्दै छानबीन समितिको सिफारिसका आधारमा फौजदारी कसुरमा अनुसन्धान गरी कारबाही गर्न नेपाल प्रहरीलाई तथा मिलेमतोमा ठेक्का लगाएको र अधिकार क्षेत्रभन्दा बाहिर गएर सम्झौता गरेको विषयमा अनुसन्धान गरी कारबाही गर्न अख्तियारलाई पत्राचार गरेको हो ।

क्याटेगोरी : देश/दुनियाँ, प्रमुख समाचार, राजनीति, समाचार, सामाजिक सञ्जाल