प्रधानन्यायाधीश जवरालाई मार्गप्रशस्त गर्न न्यायाधीशहरुको आग्रह

खोज पत्रिका मङ्लबार, २०७८ कार्तिक ९, १८ :३० बजे

काठमाडौं । प्रधानन्यायाधीश चोलेन्द्रशमशेर जबरा र सर्वोच्च अदालतका न्यायाधीशहरुबीचको छलफल सकिएको छ । पछिल्लो समय देखिएको विवादको विषयमा प्रधानन्यायाधीश जबरा र न्यायाधीशहरुबीच छलफल भएको हो । प्रधानन्यायाधीशसँग छलफलमा बस्नु अघि १५ जना न्यायाधीशले आपसमा छलफल गरेका थिए ।

प्रधानन्यायाधीश जबरा सत्ता भागवण्डा लगायतका विवादमा मुछिएपछि उनीमाथि राजीनामाका लागि दबाब बढ्दै गएको छ । सर्वोच्च अदालतका अधिकांश न्यायाधीशले उनलाई ‘मार्ग प्रशस्त’ गर्न आग्रह गरेका छन् । छलफलपछि न्यायाधीशहरु फेरि आन्तरिक छलफलमा जुटेका छन् ।

यस्तै, न्यायालयमा संकट गहिरिँदै गएपछि बिदा बसेका दुई न्यायाधीश सर्वोच्च अदालत फर्किएका छन् । न्यायाधीश कुमार चुडाल र नहकुल सुवेदी बिदा कटाएर मंगलबारबाट अदालत फर्केका हुन् । न्यायाधीश सुवेदी एक साताको बिदा स्वीकृत भए पनि उनी दोस्रो दिन नै अदालत फर्केको सर्वोच्च प्रशासनले जनाएको छ ।

त्यस्तै अर्का न्यायाधीश चुडालले पनि आगामी बिहीबारसम्मको बिदा लिएका थिए । तर उनी पनि मंगलबार नै सर्वोच्च फर्केका छन् । सर्वोच्चमा प्रधानन्यायाधीश र न्यायाधीशबीच खटपट भएपछि सर्वोच्चको सोमबारको इजलास र प्रधानन्यायाधीशले बोलाएको पूर्ण बैठक नै बस्न सकेको थिएन । सोमबार छुट्टै बैठक बसेका न्यायाधीशहरुले प्रधानन्यायाधीशले राजीनामा गरेर न्यायालयको साख जोगाउनुपर्ने निष्कर्ष निकालेका थिए ।

क्याटेगोरी : देश/दुनियाँ, प्रमुख समाचार, राजनीति, समाचार
ट्याग : #चोलेन्द्रशमशेर जबरा, #सर्वोच्च अदालतका न्यायाधीशहरु