मौन अवधिमा पनि दलहरु उपनिर्वाचनको आन्तरिक प्रचार–प्रसारमा

काठमाडौं १२ मंसिर । मौन अवधिमा पनि दलहरुले चुनाव प्रचारलाई तिव्रता दिएका छन् । मौन अवधिको समयमा प्रचारप्रसार गर्न नपाइने भएपनि आन्तरिक रुपमा मतदातालाई भेट्दै भोट माग्ने क्रम भने जारी छ । उम्मेदवारहरुले यो अवधीमा कुनैपनि चुनावी गतिविधी गर्न नपाउने भएपनि अनौपचारिकरुपमा भैरहेको क्रियाकलाप रोक्न सकिएको छैन । उपनिर्वाचन हुने ३७ जिल्लामा गएराति १२ बजेदेखि मौन अवधि सुरु भएको हो । कास्की क्षेत्र नम्बर २ मा प्रतिनिधिसभा, प्रदेशसभातर्फ भक्तपुर, दाङ र बाग्लुङ तथा स्थानीय तहका प्रमुख, उपप्रमुख, वडाध्यक्ष सहित ५२ स्थानका लागि आगामी शनिवार मतदान हुँदैछ । मौन अवधि सुरु भइसकेकाले सञ्चारमाध्ययम, समाजिक सञ्चार तथा कुनै पनि विद्युतिय माध्ययमको प्रयोग गरेर मत माग्न तथा प्रचार प्रसार गर्न पाइने छैन । मौन अवधिमा निर्वाचन आचारसंहिता पूर्ण पालना गरी निर्धक्करुपमा  मतदाताले आफ्नो मताधिकारको प्रयोग गर्ने अवस्था निर्माण गरिदिन सबैलाई आग्रह गरिएको निर्वाचन आयोगले जनाएको छ । मौन अवधिमा विभिन्न आश्वासन, प्रलोभन, डर, धाक, दवाव वा प्रभावमा पारी मतदातालाई आतंकित पार्ने, जस्ता कार्य नगर्न नगराउन समेत आयोगले आग्रह गरेको छ ।