उपनिर्वाचनमा प्रहरीले बनायो ३ चरणको सुरक्षा योजना, २ हजार ३ सय ८७ प्रहरी परिचालन !

खोज पत्रिका शुक्रबार, २०८१ बैशाख १४, ०९ :०६ बजे

काठमाडौं । वैशाख १५ मा इलाम र बझाङमा हुन लागेको प्रतिनिधिसभा र प्रदेशसभाको निर्वाचनमा प्रहरीले ३ चरणको सुरक्षा योजना बनाएर लागू गरेको छ । निर्वाचन पूर्व, निर्वाचन अवधि र निर्वाचन पश्चात् गरेर ३ चरणको सुरक्षा योजना लागू गरिएको प्रहरी प्रवक्ता भीमप्रसाद ढकालले जानकारी दिए । इलाम–२ मा प्रतिनिधिसभा र बझाङ–१ मा हुने प्रदेशसभाको उपनिर्वाचनमा प्रहरीले १२ वटा सम्भावित खतरा पहिचान गरेको छ ।

उपनिर्वाचनमा १ हजार २४ जना प्रहरी परिचालन गर्नेगरी सुरक्षा योजना तयार गरिएको डीआईजी ढकालले जानकारी दिए । निर्वाचन सुरक्षामा २ हजार ३ सय ८७ जना प्रहरी परिचालिन हुनेछन् । इलाममा १ हजार ३६३ जना र बझाङमा १ हजार २४ जना प्रहरी परिचालन गरिने छ । ४२ वटा मतदानस्थललाई अति संवेदनशील वर्गीकरण गरिएको छ ।

इलाममा १९ र बझाङमा २३ मतदानस्थललाई अति संवेदनशील वर्गीकरण गरिएको हो । मतदानस्थलमा ६९ मतदान केन्द्र अतिसंवेदनशीलको सूचीमा छन् । अति संवेदनशील मतदानस्थलमा १२ देखि १७ जना प्रहरी परिचालन गर्ने निर्णय गरिएको छ । पाँचवटा परिस्थित आएमा बल प्रयोग गर्न निर्वाचन सुरक्षामा खटिने प्रहरीलाई अनुमति दिइएको छ ।

मतदान केन्द्रमा हिंसात्मक गतिविधि हुने पूर्वसूचना पाएमा, झगडा भएर मतपेटिका तहसनहस हुने अवस्थामा आएमा, मतदान केन्द्रमा सशस्त्र आक्रमण हुने अवस्था आएमा प्रहरी कर्मचारीले बल प्रयोग गर्न सक्नेछन् । मतदाताहरुलाई कसैले मतदान गर्न जान नदिए पनि बल प्रयोग गर्न अनुमति दिइएको छ ।

राष्ट्रपति रामचन्द्र पौडेलले आगामी शनिबार हुने उपनिर्वाचनका लागि सेना परिचालन गर्न स्वीकृति दिनुभएको छ । प्रतिनिधिसभा तथा प्रदेशसभा सदस्य उपनिर्वाचन स्वतन्त्र, निष्पक्ष एवम् भयरहित वातावरणमा सम्पन्न गर्नका लागि सुरक्षा निकायहरू समन्वयात्मक रुपमा परिचालन गर्न भन्दै सेना परिचालनको स्वीकृति प्रदान गरिएको हो ।

क्याटेगोरी : जनगुनासो, प्रमुख समाचार, राजनीति, विचार/लेख, समाचार, सामाजिक सञ्जाल