संसद सचिवालय पुग्यो सांसद गोमा लाभ सापकोटालाई हटाउने पत्र

खोज पत्रिका बुधबार, २०८० फाल्गुन ३०, १० :५९ बजे

काठमाडौं । सांसद गोमा लाभ सापकोटालाई कारबाही गरेको भन्दै जनमत पार्टीले संसद सचिवालयमा पत्र पठाएको छ ।

पार्टीको निर्देशन नमानेको र स्पष्टीकरण सोध्ने र सफाइ पेश गर्ने लगायतका आन्तरिक कारबाही पूरा गरेर सांसद सापकोटा पार्टीबाट निकालिएको भनी जनमत पार्टीको संसदीय दलले फागुन २७ गते संसद सचिवालयमा पत्र पठाएको हो ।

सापकोटा पार्टीको कारबाहीमा परेको सूचना संसदमा जानकारी गराएको खण्डमा सांसद पद रिक्त हुन्छ । तर, यस सम्बन्धमा संसद सचिवालयले भने निर्णय लिइसकेको छैन ।

यसअघि, जनमत पार्टीको केन्द्रीय कार्यकारिणी समितिले अनुशासन उल्लंघन गरेको भन्दै सापकोटालाई साधारण सदस्य समेत नरहने गरी निष्काशन गरेको थियो ।

त्यस निर्णयका आधारमा जनमत पार्टीले राजनीतिक दलसम्बन्धी ऐन २०७३ को दफा ३४ उल्लेख गरेर संसद सचिवालयलाई पत्र पठाएको हो । राजनीतिक दलसम्बन्धी ऐन २०७३ को दफा ३४ मा दल त्याग गरेको सम्बन्धी सूचना दिनुपर्ने व्यवस्था छ ।