अस्ट्रेलियामा दुई पटक प्रधानमन्त्री भएका रुड राजदूतमा नियुक्त

खोज पत्रिका बुधबार, २०७९ पुस ६, १२ :२६ बजे

काठमाडौं । अस्ट्रेलियाका पूर्वप्रधानमन्त्री केभिन रुड अमेरिकाका लागि नयाँ राजदूत नियुक्त भएका छन् । रुड २००७ र २०१३ मा गरी दुईपटक अस्ट्रेलियाका प्रधानमन्त्री भइसकेका रुडले २०१० देखि २०१२ सम्म विदेशमन्त्रीको पदभार पनि सम्हालेका थिए ।

अस्ट्रेलियाका प्रधानमन्त्री एन्थोनी अल्बानिजले राजदूतका रुपमा रुडले अद्वितीय भूमिका निर्वाह गर्ने बताएका छन् । केभिन रुड अभूतपूर्व व्यक्ति हुन्, प्रधानमन्त्री र विदेशमन्त्रीको कार्यभार सम्हालिसकेका रुडले राजदूतका रुपमा नियुक्ति स्वीकार गरेर अस्ट्रेलियालाई ठूलो गुन लगाएको प्रधानमन्त्री अल्बानिजले बताए ।

वर्तमान राजदूत आर्थर सिनोडिनोसलाई प्रतिस्थापन गर्दै रुडले आगामी वर्षको सुरुमा आफनो कार्यभार सम्हाल्नेछन् । विश्व शक्तिका रुपमा उदाइरहेको चीनको सामना गर्न दुवै देशले पारस्परिक सुरक्षा सहयोगका गहन बनाइरहेका बेला चीन मामिलाका विज्ञ रुडले अमेरिकाका लागि राजदूतको जिम्मेवारी सम्हाल्न लागेका हुन्।

न्युयोर्कस्थित अन्तर्राष्ट्रिय सम्बन्धसम्बन्धी संस्था द एसिया सोसाइटीका प्रमुख समेत रहेका रुडले २०१३ मा राजनीतिबाट संन्यास लिएयता अधिकांश समय अमेरिकामा बिताउँदै आएका छन् ।

क्याटेगोरी : प्रमुख समाचार, राजनीति, विदेश, समाचार
ट्याग : #नयाँ राजदूत नियुक्त, #पूर्वप्रधानमन्त्री केभिन रुड