नेपालीले नेपाली टेलिभिजनबाट विश्वकप फुटबलको लाइभ हेर्न पाउने, शुल्क ५ सय

खोज पत्रिका बुधबार, २०७९ कार्तिक ३०, १६ :४९ बजे

काठमाडौं । सर्वोच्च अदालतले विश्वकप फुटबलको प्रत्यक्ष प्रसारण गर्न दर्शकसँग अतिरिक्त शुल्क लिन नपाउने गरी जारी अल्पकालीन अन्तरिम आदेश खारेज गरेको छ ।

न्यायाधीश प्रकाश कुमार ढुंगाना र मनोजकुमार शर्माको संयुक्त इजलासले बुधबार यसअघिको अल्पकालीन अन्तरिम आदेशलाई निरन्तरता दिन नपर्ने आदेश गरेको हो । सर्वोच्चको यो आदेशसँगै अव मिडिया हब प्रालिलाई विश्वकप फुटबलको प्रत्यक्ष प्रसारणबापत दर्शकसँग अतिरिक्त पाँच सय शुल्क लिने बाटो खुलेको छ ।

अधिवक्ता किशोर पौडेलले प्रधानमन्त्री तथा मन्त्रिपरिषदको कार्यालय सिंहदरबारलाई विपक्षी बनाएर रिट निवेदन दायर गरेका थिए । उनले विश्वकप फुटबलको प्रत्यक्ष प्रसारणमा दर्शकसँग अतिरिक्त शुल्क लिन नमिल्ने जिकिर गरेर रिट दायर गरेका थिए ।

नेपालमा विश्वकप प्रसारणका लागि मिडिया हबले शुल्क बुझाएर फिफाबाट अनुमति पाएको छ । अव सबै प्रक्रिया अघि बढाइने मिडिया हवले जनाएको छ ।