दाङमा शंकर पोखरेललाई चुनौती दिदैं रेखा शर्मा, यस्तो छ चुनावी अंकगणित

काठमाडौं । दाङ क्षेत्र नम्बर २ मा सत्ता गठबन्धन र नेकपा एमालेबीच कडा प्रतिष्पर्धा हुने देखिएको छ । सत्ता गठबन्धनका तर्फबाट नेकपा माओवादी केन्द्रकी रेखा शर्मा र नेकपा एमालेका महासचिव शंकर पोखरेलबीचको प्रतिष्पर्धा निक्कै रोचक हुने देखिन्छ ।

दाङ क्षेत्र नम्बर २ का उम्मेद्वार शंकर पोखरेल र रेखा शर्मालाई आफ्नो पक्षमा मत माग्न भ्याई नभ्याई छ । एमालेका महासचिव शंकर पोखरेललाई चुनाव जितेर आफू मात्रै होइन पार्टीको समेत साख जोगाउनुछ । माओवादी केन्द्रकी नेतृ रेखा शर्मालाई गठबन्धनको साथले बलियो उम्मेदवार बनाउदा पोखरेललाई चुनौति थपिएको छ ।

एमालेमा बैचारिक नेताको रुपमा चिनिएका पोखरेल २०५१ सालको संसदीय चुनावमा पहिलो पटक दाङबाट संसदमा प्रबेश पाए । तर, २०५६ मा उनी कांग्रेसका कृष्णकिशोर घिमिरेसँग पराजित भए । पहिलो संविधानसभा निर्वाचनमा पोखरेल समानुपातिकबाट सांसद बने । ०७० मा को संविधान सभाको निर्वाचनमा कांग्रेसका बुद्धिराम भण्डारीसँग पराजित भएका उनी २०७४ मा भने प्रदेशमा झरे ।

तत्कालीन वाम गठबन्धनबाट उम्मेद्वार बनेका पोखरेल लुम्बिनी प्रदेशको मुख्यमन्त्री समेत बने । आफूले बुटवलबाट राजधानी दाङ सार्न महत्वपूर्ण भूमिका खेलेको भन्दै त्यसको जस दिएर मतदाताले आफूलाई जिताउनेमा पोखरेल ढुक्क छन् । महासचिव पोखरेललाई यसपटक पनि चुनाव जित्न त्यति सहज भने छैन ।

पोखरेलका बिरुद्ध सत्ता गठबन्धनले माओवादी केन्द्रकी नेतृ रेखा शर्मालाई उम्मेदवार बनाएको छ । शर्मा २०७० दोस्रो संविधानसभामा समानुपातिकतर्फबाट सभासद् बनेकी थिईन् । गठबन्धनकै बलमा चुनाव जित्ने उनको दाबी छ । स्थानीय तहको निर्वाचनको मत परिणाम हेर्दा एमाले ३३ हजार ५ सय ९३, कांग्रेस २३ हजार २ सय १५, माओवादीले ८ हजार ५ सय १६, राप्रपा ३ हजार २ सय ६२, नेकपा एकीकृत समाजवादीले २ हजार आठ सय ६३ मत ल्याएका थिए ।

माओवादी, कांग्रेस र एकीकृत समाजवादी केन्द्रको मत जोड्दा ३४ हजार ५ सय ९४ पुग्छ । स्थानीय निर्वाचनको मत जोड्दा सत्तारुढ गठबन्धन एमालेभन्दा एक हजार मतले अगाडि देखिन्छ । यो क्षेत्रमा राप्रपाका भोलानाथ योगी, राष्ट्रिय स्वतन्त्र पार्टीका विशाल अधिकारी, नेकपा मालेका नेत्रप्रकाश पाण्डे, नागरिक उन्मुक्ति पार्टीका रेशम चौधरी पनि प्रतिष्पर्धामा हुँदा कसले बाजी मार्छ त्यो भने मंसिर ४ पछिको परिणाम कुर्नैपर्ने देखिन्छ ।

थप समाचार

शेख हसिनाको पार्टी बंगलादेशमा आतंककारी घोषित

जम्मु काश्मीरमा कति छन् नेपालीः दूतावाससँग तथ्यांक नै छैन

नीति तथा कार्यक्रम आज पारित हुने, संसदमा प्रधानमन्त्रीले जवाफ दिने

कांग्रेसमा उठ्यो राज्यमन्त्री कान्छारामलाई हटाइएको विषय

लण्डनको थेम्स नदीमा भेटिएको शव नेपाली विद्यार्थी ओलीकै भएको पुष्टि

सभापतिमाथि लगाएको मुद्दामा दम छैन, सरकारको प्रतिशोध मात्रै होः सोबिता…