सडक निर्माणमा पेटी ठेकेदारको बद्मासी, मजदुरहरुलाई ज्याला नदिई सम्पर्कविहिन

खोज पत्रिका शनिबार, २०७९ साउन २८, २२ :२७ बजे

रुकुम पश्चिम । जिल्लाको चौरजहारीमा सडक निर्माणको काममा लागेका मजदुरहरुले ज्याला नपाएको गुनासो गरेका छन । चौरजहारी नगरपालिका ४ को मन्कोट देखि ५ नम्बरको खहरेसम्मको सडक खण्डमा ग्राभेल र नाला निर्माणको लागि काम गरेका मजदुरले ज्याला नपाएको गुनासो गरेका हुन् । सडक निर्माणका लागि काम गरेका करिब ४० जना मजदुरले काम गरेको ६ महिना बित्दापनि रकम नपाएको चौरजहारी नगरपालिका ४ का अतिराम रोकायले जानकारी दिए ।

चौरजहारी नगरपालिका ४ मन्कोटका २० जना र वडा नम्वर ७ नार्जिका २० जना कामदारलाई करिब १० लाख रुपैया ज्याला दिन बाँकी छ । गत पुस ९ गतेदेखि फागुन १७ गतेसम्म आफुले नाला निर्माणको काम गरेको र हालसम्म ज्याला नपाएको मजदुरहरुले गुनासो गरेका छन् । पटक–पटक ज्यालाको लागि ताकेता गर्दा आफूलाई स्थानीय ठेकेदारले पैसा नभएको खाली चेक थमाईदिएर सम्पर्कविहिन भएको रोकायले जानकारी दिए ।

महिना दिनसम्म घरको काम छोडेर सडकमा काम गरेर श्रमको मूल्य नपाएको अर्का मजदुर थलबहादुर भण्डारीले बताए । आफुलाई काममा लगाउने स्थानीय ठेकेदार नारायण बुढाले पैसा नदिन सक्छु, मुद्धा हालेपनि मलाई केहि हुदैन भन्दै पन्छिने गरेको उनले गुनासो गरे । चौरजहारी नयाँ शहर आयोजना अन्तर्गतको उक्त सडकको काम द क्याभान कन्ट्रक्सन प्रालिले पाएको थियो ।

सो कन्ट्रक्सनबाट मन्कोट खहरे सडकखण्डमा ग्रोभल र नाला निर्माणको जिम्मा पेटी ठेक्का गर्ने चौरजहारी नगरपालिका ५ बेतेनीका ठेकेदार नारायण बुढाले लिएका थिए । ज्याला माग गर्ने केहि मजदुरलाई पैसा बिनाको चेक दिएर ठेकेदार बुढा सम्पर्कविहिन भएका छन । चौरजहारी नयाँ शहर आयोजनाले भने काम बापतको रकम सम्बन्धित मुख्य ठेकेदारलाई भुक्तानी भैसकेको जनाएको छ ।

मुख्य ठेकेदारबाट पेटी ठेकेदार र पेटी ठेकेदारबाट कामदारले रकम पाए नपाएको जानकारी कार्यालयमा नभएको बताईएको छ । बैंकमा पैसा निकाल्न जाँदा खातामा पैसा नै नभएकोले कानूनी प्रक्रिया अनुसार अदालत जाने मजदुरहरुले तयारी गरेका छन । ठेकेदारले तीन जनालाई खाली चेक दिएका छन ।

क्याटेगोरी : अर्थ, प्रमुख समाचार, राजनीति, समाचार
ट्याग : #जिल्लाको चौरजहारी, #मजदुरहरुले ज्याला