काठमाडौं महानगरमा बालेन साहको जित सुनिश्चित नजिक,कटाए ५० हजार मत

खोज पत्रिका मङ्लबार, २०७९ जेष्ठ १०, १६ :४५ बजे

काठमाडौं । काठमाडौं महानगरको मेयरमा स्वतन्त्र उम्मेदवार बालेन साहको लगभग जित सुनिश्चित भएको छ । मतगणना उत्तरार्धमा पुग्दा उनले दोस्रो स्थानमा रहेकी सिर्जना सिंहलाई २० हजार मतले पछि पार्दै ५० हजार कटाएका छन् ।

हालसम्म महानगरको एक लाख ५० हजार ७ सय २० भोटको गणना भइसकेकोमा बालेनले ५० हजार ९८ मत ल्याएका छन् । मुख्य प्रतिस्पर्धी कांग्रेसकी सिर्जना सिंहसँग उनको झण्डै २० हजार मतको दूरी छ । सिर्जनाले ३० हजार ७ सय ७४ मत ल्याएकी छन् ।

यस्तै, तेस्रो स्थानमा रहेका केशव स्थापितको २९ हजार ९ सय ९७ मत आएको छ । काठमाडौंमा कुल १ लाख ९१ हजार १ सय ७१ भोट खसेको थियो । त्यसमा अब ४० हजारभन्दा कम भोट गणना गर्न बाँकी छ । २१ वटा वडाको मतपरिणाम आइसकेको छ भने १० वटाको गणना जारी छ ।

वडा नम्बर १७ को भने मत गन्न सुरु भएको छैन । हाल गणना भइरहेका सबै वडाहरु कोर एरियाभित्रका छन् । तर, कोर एरिया भनिएका वडाहरुमा पनि बालेन साहले नै अग्रता लिइरहेका छन् । अव गणना हुन बाँकी मतमा पनि अन्य उमेद्वारले मत ल्याएपनि जित्न पनि गाह्रो देखिन्छ ।