चैत १ गतेदेखि सवारी लाइसेन्सको अनलाइन आवेदन बन्द

खोज पत्रिका सोमवार, २०७८ फाल्गुन ३०, २३ :३६ बजे

काठमाडौं । यातायात व्यवस्था विभागले सवारी चालक अनुमति पत्रको अनलाइन आवेदन प्रणाली बन्द गरेको छ । सार्वजनिक सूचना निकाल्दै विभागले अहिलेसम्म परेका अनलाइन आवेदनको कारबाही जतिसक्दो चाँडै टुंग्याउनुपर्ने भएकाले भोलि (चैत १ ) बाट आवेदन बन्द गरिएको जनाएको छ ।

अर्को सूचना प्रकाशन नभएसम्मका लागि सवारी चालक अनुमति पत्रको अनलाइन प्रणाली बन्द हुने विभागका प्रवक्तासमेत रहेका निर्देशक डा.लोकनाथ भुसालले जानकारी दिए । सेवाग्राहीको असुविधाप्रति विभागले क्षमा पनि मागेको छ ।

आइतबार मात्रै बागमती प्रदेशका मुख्यमन्त्री राजेन्द्र पाण्डेले सवारी चालक अनुमतिपत्र (लाइसेन्स) परीक्षा सहज बनाउने दाबी गरेका थिए । करिव १५ लाख नागरिक सवारी साधन प्रमाणपत्र पाउन बाँकी छन् ।

अबको तीन वर्ष लाग्दा पनि उनीहरुले त्यो प्रमाणपत्र लिन सक्ने अवस्था नभएको भन्दै मुख्यमन्त्री पाण्डेले सहज बनाउने दाबी गरेका थिए । तर, बिभागले भने मंगलबारबाट लाइसेन्स आवेदन नै बन्द गरिदिएको छ ।