स्थानीय तहको चुनावलाई लिएर कांग्रेसभित्र दुई धार, बैशाखमै निर्वाचन गर्नुपर्ने अधिकांशको मत

काठमाडौं । सत्तारुढ गठबन्धनले निर्वाचन ऐन संशोधन गरेर वैशाखका लागि प्रस्तावित स्थानीय तहको निर्वाचन सार्न लागेको भन्दै नेपाली काँग्रेसको संस्थापन इतर समूहले रोष प्रकट गरेको छ । सोमबार संस्थापन इतर समूहको नेताहरु शेखर कोइराला, महामन्त्री गगन थापा, अजुननरसिंह केसी, डा. चन्द्र भण्डारी, डा. रामशरण महात, डा. मिनेन्द्र रिजाल लगायतको भर्चुअल बैठकले पार्टीको संस्थागत र नीतिगत निर्णयभन्दा बाहिर गएर सत्तागठबन्धनको निर्णय लाद्ने काम पार्टी सभापति शेरबहादुर देउवाले गरेको आरोप लगाउँदै पाँच दलीय गठबन्धनले कांग्रेस पार्टी चलाउन खोजेको आरोप लगाएका छन् । यसलाई आफूहरुले नस्विकार्ने नेता अर्जुननरसिंह केसी बताउछन् ।

सरकार सञ्चालनमा बाधा अड्काउ फुकाउनका लागि बनाइएको समन्वय समितिबाटै सबै निर्णय गर्न खोजेकोप्रति कटाक्ष गर्दै संस्थापन इतर समूहले गठबन्धन सुपर पार्टी नभएको स्पष्ट पारेको छ । त्यसलाइ नमान्ने जानकारी दिदै संस्थापन इतर समुहका नेताहरुले काँग्रेसमा विधिहीनता हुन नदिने दाबी गरे । सभापति देउवाले एकलौटी ढंगले पार्टी सञ्चालन गर्न खोजेकोले अबिलम्ब केन्द्रीय कार्यसमितिको बैठक बोलाई केन्द्रीय कार्यसम्पादन समिति गठन गर्न संस्थापन इतरको माग छ ।

सभापति देउवा पक्षका नेताहरुले भने संस्थापन इतर समूहको निर्णयलाई चुनौती दिँदै जिम्मेवार नेताहरुले समस्या उत्पन्न गर्नु भन्दा समाधानको विकल्पसहित आगाडि आउनुपर्ने बताएका छन् । सभापति देउवा सत्ता गठबन्धन र प्रमुख प्रतिपक्षी दल नेकपा एमालेलाई समेत मिलाउँदै सरकारको काममा बढी ब्यस्त रहनुपरेको हुनलो पार्टीको काममा कम समय दिनुपर्ने बाध्यता आइपरेको उनीहरुको तर्क छ । निर्वाचनबारे संविधान र कानुन बाझिएको विषयलाई पार्टी भित्रका सबै नेताहरु मिलेर कसरी हल गर्ने भन्नेतिर एकसाथ अगाडि बढ्नुपर्ने संस्थापन पक्षको धारणा छ ।

अचानक स्थानीय निर्वाचनको विकल्प खोज्ने गठबन्धनको निर्णय पार्टी र लोकतन्त्रका लागि घातक हुने असन्तुष्ट नेताहरूको भनाइ छ । स्थानीय, प्रदेश र प्रतिनिधिसभा निर्वाचनमा कांग्रेस एक्लै चुनावमा जाने कि गठबन्धनसहित जानेलगायतका विषयमा छलफल गर्न पनि तत्काल पार्टी बैठक बोलाउन नेताहरूको माग छ ।

थप समाचार

सर्वोच्चको आदेश शिक्षक नेताहरूको हठका विरुद्धमा होः शंकर पोखरेल

भूकम्पीय जोखिमबाट बच्न चेतना फैलाउन आवश्यक छः राष्ट्रपति

आजदेखि बजेट अधिवेशन, प्रधानमन्त्रीले सम्बोधन गर्ने

आज भूकम्प स्मृति दिवस मनाइँदै

विद्या भट्टराईले दिइन् शिक्षा मन्त्रीलाई बधाई, प्रधानमन्त्रीलाई धन्यवाद

कक्षा १२ को वार्षिक परीक्षा नसर्ने