संबैधानिक परिषद्को बैठक सकियो, प्रधानमन्त्री पुगे शितलनिवास

खोज पत्रिका मङ्लबार, २०७७ मंसिर ३०, २१ :०६ बजे

काठमाडौं । अध्यादेश ल्याएर परिवर्तित व्यवस्थाबमोजिम बसेको संवैधानिक परिषद्को बैठक विनानिष्कर्ष सकिएको छ । प्रधानमन्त्री निवास बालुवाटारमा बसेको बैठकमा संवैधानिक परिषद्का कामका विषयमाथि छलफल भएपनि कुनै निर्णय नभएको बताइएको छ । बैठकमा प्रधानमन्त्री केपी शर्मा ओलीसहित परिषद्का सदस्यहरू राष्ट्रिय सभाका अध्यक्ष गणेशप्रसाद तिमल्सिना र प्रधानन्यायाधीश चोलेन्द्रशमशेर जबरा सहभागी थिए ।

मंगलबार बिहान दोस्रोपटक बोलाइएको परिषद्को बैठकमा समेत गणपूरक संख्या नपुगेपछि प्रधानमन्त्री ओलीले अध्यादेश ल्याएर ऐन नै परिवर्तन गरी बैठक बसेको थियो । परिषद्को सदस्यमा बहाल रहेका प्रमुख प्रतिपक्षी दल कांग्रेसका नेता शेरबहादुर देउवा र प्रतिनिधिसभाका सभामुख अग्निप्रसाद सापकोटा भने बैठकमा सहभागी भएनन् ।

त्यस्तै, संवैधानिक परिषदको बैठक लगत्तै प्रधानमन्त्री ओलीले राष्ट्रपति बिद्यादेवी भण्डारीसँग छलफल गर्नुभएको छ । परिषदको बैठक सकेपछि साँझ साढे सात बजेतिर ओली राष्ट्रपति विद्यादेवी भण्डारीसँग छलफलका लागि राष्ट्रपति कार्यालय शितल निवास पुग्नुभएको थियो । राष्ट्रपतिसँग भएको छलफलबारे भने कुनै जानकारी दिइएको छैन् ।

क्याटेगोरी : प्रमुख समाचार, ब्रेकिंग न्युज, राजनीति, समाचार
ट्याग : #संवैधानिक परिषद्को बैठक