बालेन सरकार ऐनले नचिनेका व्यक्तिको स्वेच्छाचारी शासन भएको एमालेको निष्कर्ष

खोज पत्रिका शुक्रबार, २०८३ असार १९, १७ :५२ बजे

काठमाडौं । नेकपा एमालेले रास्वपाका वरिष्ठ नेता बालेन शाह नेतृत्वको सरकारको १०० दिनको समीक्षा गरेको छ । महासचिव शंकर पोखरेलले एक विज्ञप्ति जारी गर्दै बालेन सरकारको सय दिनको वाचा र यथार्थको समीक्षा गरेको हो ।

एमालेले सरकारको १०० दिनको परिणामलाई विश्लेषण गर्दा, अत्यन्त फितलो, अपरिपक्व र विवादास्पद भएको निष्कर्ष निकालेको छ । विज्ञप्तिमा बालेन–सरकारको १०० दिने कार्यकाल सुशासन र शासकीय सुधारका दृष्टिकोणले पूर्णतः असफल देखिएको दाबी गरेको छ ।

प्रधानमन्त्री र मन्त्रीका निजी सचिवालयहरू नै आर्थिक स्वार्थ र भ्रष्टाचारका घटनाहरूमा खुलेआम जोडिएका प्रमाणहरू एकपछि अर्को गर्दै सार्वजनिक भइरहेको उल्लेख छ । आफ्नो १०० बुँदे वाचापत्र र आमजनताको अपेक्षाअनुरूप काम गर्नुको साटो सस्तो चर्चा र विवादास्पद निर्णयहरूमा मात्रै सरकारको रुचि देखिएको उल्लेख छ ।

बिहानीले दिनको संकेत गर्छ भनेझैँ सय दिनको सरकारको कामले मुलुकको आर्थिक संकट समाधान गर्न र विधिको शासन कायम गर्न सरकार पूर्णरुपमा असफल साबित भएको एमालेको निष्कर्ष छ ।

क्याटेगोरी : जनगुनासो, प्रमुख समाचार, राजनीति, विचार/लेख, समाचार, सामाजिक सञ्जाल