Techie IT
  • ७ कात्तिक २०७८, आईतबार
KhojPatrika

बालुवाटार छिर्यो कोरोना,प्रधानमन्त्रीका सल्लाहकार सहित ७६ जनालाई कोरोना पुष्टि


काठमाडौं । कोरोना भाइरस प्रधानमन्त्री निवास बालुवाटार छिरेको छ । प्रधानमन्त्री केपी शर्मा ओलीको सरकारी निवास बालुवाटारमा कार्यरत ७६ जनामा कोरोनाभाइरस संक्रमण पुष्टि भएपछि बालुवाटारमा कोरोना छिरेको हो । इपिडिमियोलोजी तथा रोग नियन्त्रण महाशाखामा गरिएको परिक्षणमा प्रधानमन्त्रीका सल्लाहकार, सचिवालयमा कार्यरत कर्मचारी, सुरक्षाकर्मी चालकलगायत ७६ जनामा कोरोना संक्रमण पुष्टि भएको हो ।

संक्रमितमा प्रधानमन्त्रीका प्रमुख राजनीतिक सल्लाहकार विष्णु रिमाल, परराष्ट्र सल्लाहकार राजन भट्टराई, प्रेस सल्लाहकार सूर्य थापा, फोटो ग्राफर राजन काफ्ले लगायतका सचिवालयका सदस्य समेत रहेका छन् । संक्रमितमध्ये रिमाल, भट्टराई, थापा र काफ्लेले सामाजिक सञ्जाल मार्फत आफूहरु संक्रमित भएको जानकारी दिएका छन् । उनीहरुले आफूहरुको सम्पर्कमा आउनेहरुलाई सचेत हुन सुझाब समेत दिएका छन् ।

कोरोना परीक्षण भएकामध्ये प्रधानमन्त्री केपी शर्मा ओलीको भने कोरोना रिपोर्ट नेगेटिभ आएको छ । बाक्लो भेटघाट र चहलपहल हुने बालुवाटारमा कार्यरत ७६ जनामा संक्रमण देखिएपछि उनीहरुको सम्पर्कमा रहेका धेरै कन्ट्याक्ट ट्रेसिङमा परेका छन् । पछिल्लो २४ घण्टामा देशभर २ हजार १ सय २० जना कोरोनाभाइरस संक्रमित थपिएका छन् । योसँगै देशभर संक्रमितको कु्ल संख्या ८४ हजार ५ सय ७० पुगेको छ । शनिबार १२ हजार ९ सय ७८ जनामा पीसीआर परीक्षण हुँदा सो संख्यामा संक्रमण पुष्टि भएको हो।

यस्तै काठमाडौंमा १ हजार १, भक्तपुरमा ६७ र ललितपुरमा १०९ गरी उपत्यकामा १ हजार १ सय ७७ जनामा संक्रमण पुष्टि छ । यस्तै देशभर सक्रिय संक्रमित २१ हजार ३०२ रहेका छन् भने संस्थागत आइसोलेशनमा ९ हजार ७७३ र होम आइसोलेशनमा ११ हजार ५२९ रहेका छन् यस्तै २४ घण्टामा थप २०४४ जना निको भएसँगै हालसम्म निको हुनेको कुल संख्या ६२ हजार ७ सय ४० पुगेको छ ।


क्याटेगोरी : प्रमुख समाचार, ब्रेकिंग न्युज, समाचार
ट्याग : #कोरोना परीक्षण, #बालुवाटार

तपाईको कमेन्ट लेख्नुहोस्