आजदेखि रवि लामिछानेमाथि रुपन्देहीको सुप्रिम सहकारी ठगी प्रकरणमा बयान !

खोज पत्रिका मङ्लबार, २०८१ कार्तिक २७, १५ :२२ बजे

काठमाडौं । सहकारी ठगी प्रकरणमा अनुसन्धानका लागि कास्की प्रहरीको हिरासतमा रहेका पूर्वगृहमन्त्री एवं राष्ट्रिय स्वतन्त्र पार्टीका सभापति रवि लामिछानेलाई भैरहवा लगिदैछ ।

भैरहवाको बुटवलस्थित सुप्रिम सहकारीको रकम गोर्खा मिडियामार्फत अपचलन गरेको कसुरमा भइरहेको अनुसन्धानमा बयानका लागि लामिछानेलाई जहाजमार्फत भैरहवा लैजान लागिएको हो । प्रहरीले लामिछानेलाई बिहान साढे ५ बजे नै पोखरा एयरपोर्टमा पुर्‍याएको भएपनि हुस्सुका कारण उडान प्रभावित भएको छ ।

उनको आजै बयान सुरु गरिने रूपन्देहीका प्रहरी प्रमुख प्रहरी उपरीक्षक रञ्जित सिंह राठौरले जानकारी दिए । सुप्रिम सहकारीको रकम हिनामिना गरेको आरोपमा यस अघि नै लामिछाने विरुद्ध पक्राउ पुर्जी जारी भइसकेको छ ।

बुटवलको सुप्रिम सहकारीको बचत रकम मध्ये १४ करोड बढी रकम गोर्खा मिडिया नेटवर्कका अध्यक्ष जीवी राई, उपाध्यक्ष एवं पूर्व डिआईजी छविलाल जोशी तथा रवि लामिछानेको समूहले अपचलन गरेको रूपन्देहीमा मुद्दा छ ।

रूपन्देही प्रहरीले यस अघि गोर्खा मिडिया नेटवर्कका उपाध्यक्ष जोशीलाई पनि पोखराबाट लगेर रूपन्देहीमै बयान लिएको थियो । सोही सहकारीको रकम अपचलनमा कुमार रम्तेल र शिवबहादुर गुरुङको रूपन्देहीमा सरकारी वकिल समक्ष बयान जारी छ ।