एमाले फुटेको दुई वर्ष पुरा, एकीकृत समाजवादीबाट एमालेमै फर्किदै नेता कार्यकर्ता

खोज पत्रिका शनिबार, २०८० भदौ ९, २१ :४४ बजे

काठमाडौं । नेकपा एमाले विभाजन भएको दुईवर्ष पुरा भएको छ । एमाले विभाजन भएर बनेको नेकपा एकीकृत समाजवादीका नेताहरु भने एमालेमै फर्कने क्रम शुरु भएको छ । तर अध्यक्ष माधवकुमार नेपालले भने पार्टी विस्तार हुँदै गएको दाबी गरेका छन् । पार्टी स्थापनाको दुईवर्षपछि नेकपा एकीकृत समाजवादीको महाविधेशन आगामी माघमा हुने तय भएको छ ।

नेकपा एकीकृत समाजवादी स्थापनाको दुईवर्ष पुरा भएको छ । २ वर्षअघि नेकपा एमालेबाट विद्रोह गर्दै माधवकुमार नेपाल, झलनाथ खनाल लगाएतका नेताहरुले नेकपा एकीकृत समाजवादी स्थापना गरेका छन् । पार्टी स्थापना दिवसको अवसरमा भएको कार्यक्रममा अध्यक्ष माधवकुमार नेपालले आफ्नो पार्टी बिस्तार हुँदै गएकोमा नेकपा एमाले आतंकित बनेको बताएका छन् ।

अध्यक्ष नेपालले एकीकृत समाजवादीले राजनीतिमा आफ्नो औचित्य पुष्टि गरेको समेत बताएका छन् । नेकपा एकीकृत समाजवादीका सम्मानित नेता झलनाथ खनालले सत्ता गठबन्धनले संविधान उल्लंघन गर्दा पार्टीले आफ्नो धारणा स्पष्ट गर्न नसकेको बताएका छन् । उनले पार्टी स्थापनाको औचित्य पुष्टि गर्नुपर्ने समेत बताएका छन् ।

नेकपा एकीकृत समाजवादीभित्र अहिले दुईधार देखिएको छ । सम्मानित नेता झलनाथ खनालसहित सचिव रामकुमारी झाँक्री लगाएतका नेताहरुले पार्टी विभाजनको औचित्य पुष्टि गर्न नसकेको बताउन थालेका छन् । भने कतिपय जिल्लामा भने नेकपा एकीकृत समाजवादीको जिल्ला कमिटि नै एमालेमै समाहित हुने क्रम बढेको छ । त्यसोत मुकुन्द न्यौपाने लगाएतका नेताहरु एमालेमै फर्किसकेका छन् ।