लकडाउनलाई निरन्तरता, साउन ७ गतेसम्म यथावत

काठमाडौं । सरकारले हाल जारी खुकुलो लकडाउनलाई आगामी साउन ७ गतेसम्म लम्ब्याउने निर्णय गरेको छ । सोमबार राति प्रधानमन्त्री निवास बालुवाटारमा बसेको मन्त्रिपरिषद्को बैठकले लकडाउनलाई साउन ७ गतेसम्म लम्ब्याउने निर्णय गरेको हो । यस्तै हवाइ उडान र सीमा नाका पनि साउन ७ गतेसम्म लम्ब्याउन निर्णय भएको छ ।

कोरोना संक्रमणदर बढ्दै गएकाले अहिलेलाई यही शैलीको लकडाउनलाई स्वास्थ्य सतर्कता अपनाउन आग्रह गरिएको छ । चैत ११ गतेदेखि लागू गरेको लकडाउन सरकारले असार १ देखि लागू हुनेगरी खुकुलो बनाएको थियो । अहिले निजी सवारीसाधन जोर विजोर प्रणालीबाट सञ्चालन भइरहेका छन् भने सार्वजनिक सवारीसाधन तथा उद्दारबाहेकका हवाई उडान बन्द छन । त्यस्तै सीमित बजार पसलहरु सञ्चालन भएपनि भीडभाड हुने सिनेमा हल, सपिङ मल, शैलुन, पार्लर, विद्यालयजस्ता क्षेत्रहरु बन्द छन । लकडाउनलाई क्रमिक रुपमा खुकुलो बनाउँदै जानेगरी यसअघि सरकारले विभिन्न चरणका योजनाहरु सार्वजनिक गरेको थियो ।