दुर्गेश थापाको ‘पैसा’ नामक गीत तत्काल प्रसारणमा रोक लगाउन माग

खोज पत्रिका आइतवार, २०७८ माघ १६, २१ :२५ बजे

काठमाडौं । गायक दुर्गेश थापाको गीतमा महिलालाई पैसासँग तुलना गरिएको भन्दै प्रसारण बन्द गर्न आग्रह गरिएको छ । वैज्ञानिक समाजवादी महिला सङ्गठनले विज्ञप्ति जारी गरी हालै सार्वजनिक भएको गायक थापाको ‘पैसा’ नामक म्युजिक भिडियोमा सभ्य समाजमा पाच्य नहुने खालका शब्दहरू प्रयोग भएको भन्दैगीत प्रसारण बन्द गर्न सम्बन्धित संस्था र राज्यका निकायलाई अनुरोध गरेको हो।

कलाकारले प्रयोग गर्ने शब्द, भेशभूषा र प्रस्तुतिले समाजमा अल्पकालीन र दीर्घकालीन असर पार्दछ, नेपाली समाजमा महिलामाथि हुने बलात्कारजन्य हिंसा, मानसिक र शारीरिक रूपमा हुने हिंसा वृद्धिमा सिनेमा, साहित्य र गीतमा महिलाको गरिमा र अस्तित्वलाई सस्तो र महिलाद्वेषी प्रस्तुत पनि एक कारण हो विज्ञप्तिमा उल्लेख गरिएको छ ।