न्याय माग्दै भौतारिरहेका छन् ३० नर्सिङ बिद्यार्थी 

काठमाडौं १० मंसिर । भक्तपुरस्थित चक्रवर्ती हबी एजुकेसन एकेडेमी कलेज अफ नर्सिङ साइन्सले नर्सिङ पढाउने भन्दै ठगेपछि ३० जना नर्सिङका विद्यार्थीहरु चार महिना देखि अलपत्र परिरहेका छन । अन्योलग्रस्त भविष्यको चिन्ताले उनीहरु कहिले प्राविधिक शिक्षा तथा व्यावसायिक तालिम परिषद् (सिटिइभिटी), त कहिले शिक्षा मन्त्रालय, त कहिले भर्ना गर्ने कलेजमा धाइरहेका छन् । तर, उनीहरुको संमस्या समाधान हुन सकेको छैन् । आफ्नो समस्यामा कुनै चासो नदेखाएपछि उनीहरुले मंगलबार  कलेज प्रशासन कक्ष र प्रमुखको कक्षमा तालावन्दी गरे । तत्कालीन शिक्षामन्त्री गोपालमान श्रेष्ठको अध्यक्षतामा बसेको बैठकले २०७४ असोजमा कलेजको सम्बन्धन खारेज गरेपनि कलेजले गएको शैक्षिक सत्रमा विज्ञापन गरी ३० जना विद्यार्थीबाट जनही ३ लाख ११ हजार रुपैयाँका दरले असुलेर विद्यार्थीलाई अलपत्र पारेको थियो ।

कलेजको प्रयोगात्मक पूर्वाधार नभएका कारण सम्बन्धन खारेज गरेको भनिदै गर्दा सोही अस्पतालसँग प्रयोगात्मक कक्षाको साझेदारी गर्ने भन्दै चक्रवर्ती हबीको संकाय खारेज गर्नुपूर्व नै खोप कलेजलाई सम्बन्धन दिइनुले मन्त्री र सीटीईभीटीको कुनै साँठगाँठ र स्वार्थ थियो कि भनेर शंका गर्ने प्रशस्तै ठाउँ छन् । सोही अस्पतालमा प्रयोगात्मक कक्षा सञ्चालन गर्ने भन्दै कागजात पेश गरेको श्रद्धा कजेललाई समेत सम्बन्धन दिइनुले सीटीईभीटीमाथी नै प्रश्न तेर्सीएको छ । यदी प्रवीणता प्रमाण पत्र तह नर्सिङ कार्यक्रमको लाइसेन्स सिटिइभिटीबाट दुई वर्षअघि नै खारेज भएको कलेज भ्रमपूर्ण विज्ञापन गर्दै दुर्गमका विद्यार्थीलाई ठगी गरेको छ । तर, छानविन गरेर क्षतिपूर्ती भराउन शिक्षा विज्ञान तथा प्रविधि मन्त्री र मन्त्रालयले चासो देखाएका छैनन् । कलेज प्रशासन, सीटीईभीटी र मन्त्रालयले निकास नदिदा ३० जना बिद्यार्थी यतिबेला भौतारिरहेका छन् ।