रुकुम पश्चिममा प्रचण्ड र माधवले सम्बोधन गर्ने, दश हजार बढी कार्यकर्ता उतारिने

खोज पत्रिका बुधबार, २०८२ पुस २३, १८ :५५ बजे

रुकुमपश्चिम । नेपाली कम्युनिष्ट पार्टी रुकुम पश्चिमले पुस २६ गते बृहत एकता सन्देश सभा गर्ने भएको छ । बुधबार पत्रकार सम्मेलन गरी नेकपाले एकता सन्देश सभाको बारेमा जानकारी दिएको हो ।

कार्यक्रममा नेकपाका जिल्ला ईन्चार्ज बसन्त शर्माले दुई पूर्व प्रधानमन्त्रीहरु पार्टीका संयोजक पुष्पकमल दाहाल प्रचण्ड र सहसंयोजक माधव कुमार नेपालले सभालाई सम्बोधन गर्ने कार्यक्रम तय भएको जानकारी दिए ।

बामघटक दलहरुको बृहत एकतापछि जिल्लामा पहिलो पटक हुने सभाको तयारी तिब्र रुपमा भईरहेको बताइएको छ । मुसिकोट नगरपालिका १ को बराहाटाकुरामा सभा हुने र सभामा दश हजार बढी कार्यकर्ताहरु सहभागी हुने दाबी गरिएको छ ।

बामपन्थी एकताको पक्षमा रुकुमको ऐक्यबद्धता देखाउन, पार्टीको धारण जनतामास स्पष्ट पार्न र आगामी प्रतिनिधि सभाको चुनाव लक्षित पार्टीको धारणा सार्वजनिक गर्न सभा आयोजना गरिएको जिल्ला ईन्चार्ज शर्माले बताए ।

तत्कालिन माओवादी केन्द्रका नेता जनार्दन शर्माले आम जनता र कम्युनिष्ट आन्दोलनलाई धोका दिएर एकता प्रक्रियाबाट पन्छिएकोले रुकुम जिल्ला व्यक्ति भन्दा विचारकै पक्षमा उभिएको सन्देश प्रवाह हुने उनले जानकारी दिए ।

त्यस्तै, प्रतिनिधि सभा सदस्यमा नेकपाबाट एकल रुपमा सिफारिस भएका गोपाल शर्माले विगतको विरासत जोगाउन नेकपा सफल हुने बताए । उनले जिल्लाका सर्वमान्य नेता जनार्दन शर्माले पार्टी छोडेपछि विकल्पमा जानु परेको र उक्त जिम्मेवारी आफूले ग्रहण गरेको उल्लेख गरे ।

क्याटेगोरी : प्रमुख समाचार, राजनीति, समाचार, सामाजिक सञ्जाल