प्रचण्डले देशलाई संकटमा हालेका थिए, ओलीले सुधारेः शंकर पोखरेल

खोज पत्रिका शनिबार, २०८२ भदौ ७, १८ :३२ बजे

काठमाडौं । नेकपा एमालेका महासचिव शंकर पोखरेलले पार्टी अध्यक्ष केपी ओली प्रधानमन्त्री बनेपछि देशमा विकास निर्माणले तीव्रता पाएको दाबी गरेका छन् ।

शनिवार एक कार्यक्रमलाई सम्बोधन गर्दै नेकपा माओवादी केन्द्रका अध्यक्ष प्रचण्ड प्रधानमन्त्री हुँदा देश ओरालो अवस्थामा लागेको भए पनि ओली प्रधानमन्त्री बनेपछि देश अगाडि बढिरहेको जिकिर गरे ।

उनले भने, ‘प्रचण्ड प्रधानमन्त्री हुँदा शिक्षक कर्मचारीले तलब नपाउने अवस्था थियो । राजस्व घटिरहेको थियो । निर्माण व्यवसायीले काम गरेको भुक्तानी नपाउने अवस्था थियो ।

उद्योग व्यवसाय बन्द हुने अवस्थामा थियो । देश आर्थिक मन्दी र संकटको अवस्थामा थियो । तर, अहिले यो सरकार बनेपछि राजस्व बढेको छ, सरकारको खर्च गर्ने क्षमता बढेको छ । शिक्षक कर्मचारीले तलबको चिन्ता गर्नुपर्ने अवस्था छैन।’

उनले कांग्रेस र एमालेले अघि सारेको नीतिकै कारणले देशको निजी क्षेत्र उत्साहित भएको र देशमा लगानीको वातावरण बनेको जिकिर गरे ।

क्याटेगोरी : जनगुनासो, देश/दुनियाँ, प्रमुख समाचार, राजनीति, समाचार