म पछि हट्ने अवस्थामा छैन, खुट्टा पनि कमाउँदिनँः पूर्वराष्ट्रपति भण्डारी

खोज पत्रिका बुधबार, २०८२ साउन ८, ०३ :४३ बजे

काठमाडौं । पूर्वराष्ट्रपति विद्यादेवी भण्डारीले आफूपछि हट्ने अवस्था नरहेको र नेतृत्वका लागि खुट्टा पनि नकमाउने बताएकी छिन् ।

कपनस्थित भंगालमा मंगलबार पत्रकारहरूसँग कुरा गर्दै पूर्वराष्ट्रपति भण्डारीले आफू सक्रिय राजनीतिमा आउने कुरामा कोही भयभीत हुनुपर्ने अवस्था पनि नरहेको बताइन् ।

उनले आफ्नो पक्षमा बोल्नेहरूलाई आतंकित पार्न खोजिएको भन्दै त्यस्ता क्रियाकलाप बन्द हुनुपर्ने बताइन् । पूर्वराष्ट्रपति भण्डारीले आफू एमालेको सक्रिय राजनीतिमा आइसकेको भन्दै पछि नहट्ने प्रष्ट पारेकी हुन ।

भण्डारीले महाधिवेशन नआई नेतृत्वको बहस गराएर कार्यकर्ता विभाजित गर्न खोजिएको समेत बताइन् । उनले जिल्ला र प्रदेशदेखि नै ग्रुपिजम गरेर कार्यकर्तालाई आतंकित पार्ने र बोल्न नदिने प्रयास भइरहेको बताइन ।

भण्डारीले आफू कठिन समयमा पार्टी र महिला आन्दोलन हुँदै देशको नेतृत्व गरेको भन्दै अनावश्यक रुपमा विवाद उचाल्न खोजिएकोमा असन्तुष्टि जनाइन् ।

भण्डारीले आफ्नो सदस्यता नवीकरण भइसकेको भन्दै अध्यक्ष केपी शर्मा ओलीसँग यस विषयमा कुरा भएको बताइन् । उनले नयाँ वर्षको आफ्नो वक्तव्यपछि ओली चिढिएको समेत सुनाइन् ।

क्याटेगोरी : जनगुनासो, प्रमुख समाचार, राजनीति, विचार/लेख, समाचार, सामाजिक सञ्जाल