सिआइबीले लियो धनराज गुरुङसँग ५ घण्टा बयान,डिभोर्स सक्कली नै भएको दाबी

खोज पत्रिका बुधबार, २०८१ कार्तिक २८, २१ :५८ बजे

काठमाडौं । सहकारी ठगी प्रकरणको विषयमा नेपाली कांग्रेसका उपसभापति धनराज गुरुङसँग प्रहरीको केन्द्रीय अनुसन्धान ब्यूरो (सिआइबी)ले बयान लिएको छ । लाजिम्पाटस्थित सिआइबीको कार्यालयमा बोलाएर बुधबार मितेरी सहकारी ठगीबारे उनीसँग बयान लिइएको हो ।

झण्डै ५ घण्टा बयान लिएपछि घटना विवरण कागज गराएर छाडिएको सिआइबीले जानकारी दिएको छ । मध्यान्न १२ देखि साँझ ५ बजेसम्मै सोधपुछ गरिएको थियो । ललितपुर महानगरपालिका ५ स्थित महालक्ष्मीस्थानमा रहेको मितेरी सहकारीको रकम अपचलन गरेको आरोपमा सहकारीका सञ्चालक ज्योति गुरुङसहित ५ जना विरुद्ध जाहेरी परेको छ ।

ज्योति गुरुङ धनराजकी पूर्वपत्नी हुन् । उनीहरूबीच २०७६ फागुन २९ मा ललितपुर जिल्ला अदालतबाट सम्बन्ध विच्छेद भएको थियो । त्यसपछि पनि उनीहरू सँगै बस्दै आएको र दायित्व बेहोर्दै आएको समाचार सार्वजनिक भएको थियो । हाल ज्योतिसहितका आरोपीमाथि रेड नोटिस जारी भइसकेको छ ।

प्रहरीले गुरुङसँग सहकारीबाट लिएको ९१ लाख ऋण र सहकारीको रकम अपचलनबारे सोधपुछ गरेको जानकारी दिएको छ । मितेरी सहकारीको १२ करोड ५१ लाख रकम अपचलन भएको भेटिएको छ ।