रुकुमपश्चिमको डिग्रे शाईकुमारी मन्दिरमा पूजापाठ सुरु

खोज पत्रिका मङ्लबार, २०८१ कार्तिक २७, ०९ :२७ बजे

रुकुमपश्चिम । जिल्लाको मुसिकोट नगरपालिका –५ थर्पूमा रहेको डिग्रे शाईकुमारी मन्दिरमा आजदेखि पूजापाठ सुरु भएको छ । हरेक वर्ष हरिबोधिनी एकादशी देखि पूर्णिमाको दिनसम्म दर्शनार्थीको बाक्लो भिड लाग्ने मन्दिरमा बिहानैदेखि पूजापाठ सुरु भएको हो ।

आज बिहान ५ बजे देखि शाईकुमारी मन्दिरको दर्शन तथा पूजापाठका लागि श्रद्दालु भक्तजनको बाक्लो उपस्थिति रहेको मन्दिर व्यवस्थापन समितिका अध्यक्ष लाल बहादुर केसीले बताए । डिग्रे मन्दिरमा बाह्रैमास पूजापाठ हुँदै आएपनि मूल पर्वको रुपमा एकादशी देखि पूर्णिमाको दिन सम्म भव्य रुपमा पूजापाठ र मेला लाग्ने गर्दछ ।

मनले चिताएको पूरा हुने धार्मिक जनविश्वास रहेको डिग्रे मन्दिरमा पूजापाठका लागि देशका विभिन्न ठाउँबाट सर्वसाधारणको उपस्थिति हुने गरेको छ । हरिबोधनी एकादशीका दिन तुलसीको विवाहसहित शुद्ध रुपमा बिशेष पुजापाठ गरिने छ ।

२८ गतेका दिन द्वादशी, २९ गते एकैदिन त्रयोदशी र चतुर्दशी परेकोले यी दुई दिन मात्र बोकाको बलि दिन सकिनेछ । ३० गते पुर्णिमाको दिन पुजापाठसँगै भव्य मेला लाग्ने गर्दछ । पुर्णिमाको दिन मन्दिरमा टिका ग्रहण गर्नका साथै मेलामा आकर्षक नाचगान र विभिन्न झाँक्रीहरु प्रस्तुत हुने गर्दछन् ।

परम्परागत सगाल नाच यहाँको मुख्य आकर्षण रहेको हुन्छ । मन्दिर क्षेत्रका रुख विरुवा नकाट्न, मन्दिरको धारामा फोहोर नफाल्न समेत सूचना जारी गरिएको छ । मेलामा भैँसी राँगा, कुखुरा, संगुर, बंगुरको मासु र अण्डा पुर्ण रुपमा निषेध गरिएको समितिले जनाएको छ । त्यस्तै मन्दिरको भिडलाई मध्यनजर गर्दै गतवर्ष देखि सिसि क्यामेरा जडान गरिएको छ ।