निर्वाचन आयोगद्धारा प्रमुख दलका नेतासहित २४ सय जनालाई तोक्यो १५ हजार जरिवाना

खोज पत्रिका बुधबार, २०८० साउन १०, ०१ :३० बजे

काठमाडौं । निर्वाचन आयोगले प्रतिनिधिसभा तथा प्रदेशसभा सदस्य निर्वाचनको चुनाव खर्च नबुझाउने उम्मेदवारलाई कारबाहीस्वरुप १५ हजार जरिवाना तोकेको छ ।

आयोगले आज एक सूचना जारी गरी चुनावमा भएको खर्च नबुझाउने प्रतिनिधिसभाका १ हजार ३७ तथा प्रदेश सभामा १ हजार ३ सय ९८ गरी कूल २ हजार ४ सय ३५ जनालाई प्रति व्यक्ति १५ हजारका दरले जरिवाना तोकेको हो ।

निर्वाचन आयोगले तोकिएको जरिवानाका साथ सात दिनभित्रमा निर्वाचन खर्चसमेत पेस गर्न निर्देशन दिएको छ । यसरी खर्च पेस नगरी कारबाहीमा पर्नेहरुमा नेपाली कांग्रेसका महामन्त्री गगन थापा, एमाले नेता राजन भट्टराई, जनता प्रगतिशिल पार्टीका अध्यक्ष ह्दयेश त्रिपाठी, रास्वपाकी सांसद सोविता गौतम, पूर्वसभामुख ओनसरी घर्तीसहितका नेताहरु रहेका छन् ।

आयोगले ५ सय ३ जना स्वतन्त्र उम्मेदवार, नेपाली कांग्रेसका २१ जना, नेकपा एमालेका १८, राष्ट्रिय स्वतन्त्र पार्टीका ३९ जनासहित २ हजार ४ सय ३५ जनालाई जनही १५ हजार रुपैया जरिवाना तोकेको हो ।