अमुक अपेक्षाहरु पूरा नगरेपछि मेरो चरित्रहत्या गर्न खोजियोः जनार्दन

खोज पत्रिका शुक्रबार, २०८० असार १, १४ :४२ बजे

काठमाडौं । नेकपा माओवादी केन्द्रका उपमहासचिव जनार्दन शर्मा ‘प्रभाकर’ ले कान्तिपुर दैनिकले आफ्नो चरित्रहत्या गर्ने उद्देश्यले समाचारमा जबरजस्त आफूलाई जोडेको जिकिर गरेका छन् । शर्माले पत्रिका सम्वद्ध व्यक्तिहरुको अमुक अपेक्षाहरू पूरा नगरेका कारण व्यक्तिगत मानहानी र चरित्रहत्या गर्ने गरी समाचार प्रकाशित गरेको जिकिर गरेका हुन् ।

कान्तिपुर दैनिकको जेठ ३२ बिहिबार ‘नेपाली र अमेरिकी ठग्ने दुई गिरोहको साँठगाँठ’ शिर्षकको समाचारका विषयबस्तु निराधार, कप‍ोलकल्पित भएको भन्दै आफ्नो ध्यानाकर्षण भएको सामाजिक सञ्जालमा उल्लेख गरेका छन् । उनले समाचार पूर्वाग्रहपूर्ण र अतिशयोक्ति भएको समेत बताए ।

माओवादी केन्द्रका संगठन विभाग प्रमुख समेत रहेका शर्माले समाजिक संजालमार्फत आफ्नो चरित्रहत्या गर्ने गरी प्रकाशित समाचारमा समावेश गरिएका विषयबस्तुमाथि अनुसन्धान गर्न आफू तयार रहेको बताउँदै भ्रमपूर्ण समाचारको पछि नलाग्न आग्रह समेत गरेका छन् ।
यस्तो जनार्दन शर्माको स्टाट्स
कान्तिपुर दैनिकको मिति २०८०, जेठ ३२ बिहिबारको बर्ष ३१ अंक ११७ मा प्रकाशित “नेपाली र अमेरिकी ठग्ने दुई गिरोहको साँठगाँठ “ शिर्षकमा प्रकाशित समाचारमा मेरो तस्विर समेत राखी अतिशयोक्ति एंव भ्रामक समाचार प्रकाशन गरेकोमा मेरो गंभीर ध्यानाकर्षण भएको छ । समाचारको उठान र प्रस्तुति जसरी गरिएको छ, त्यो आफैमा पूर्वाग्रह र अतिशयोक्तिले भरिएको छ ।

उक्त विषयवस्तुलाई अनेकौँ जलप लगाएर आम पाठक र सर्वसाधारणलाई भ्रम श्रृजना गरी पूर्वाहग्रहपूर्ण ढंगबाट मलाई जोडेर मेरो राजनितिक जीवनमा समेत प्रश्न उठाउन खोजिएबाट म चुप लागेर बसेमा कान्तिपुर दैनिकले म माथि लगाएका संगीन आरोपहरूलाई मौन रुपमा स्विकारेको ठहर्ने भएकोले मैले सामाजिक सञ्जालहरु मार्फत यि कुराहरु राख्न बाध्य भएको हु । उक्त समाचारमा उठाइएका विषयबस्तुहरु सवै निराधार र कपोलकल्पित हुन, त्यसका लागी म जुनसुकै अनुसन्धानका लागी समेत तयार रहेको व्यहोरा अवगत गराउन चाहन्छु ।

उक्त दैनिक र दैनिक सम्वद्ध व्यक्तिहरुको अमुक अपेक्षाहरू पूरा नगरेको सन्दर्भलाई मेरो व्यक्तिगत मानहानी र चरित्रहत्या गर्ने उद्धेश्यले तथ्यलाई तोडमोड गरी जवरजस्ती ढंगबाट समाचारमा मलाई तान्न खोजिएको छ । जुन कुरा सरासर गलत र मनगडन्ते हो । यस बिषयमा मैले निकट भविष्यमा वास्तविकतासहितको विवरण आम नेपाली सामु राखी प्रस्ट्याउने छु । साथै उक्त दैनिकका यस्ता भ्रमपूर्ण समाचारको पछाडि नलाग्न समेत सबैमा हार्दिक अपील समेत गर्दछु ।