१९ दिनका लागि हरिकृष्ण कार्की प्रधानन्यायाधीश बन्दै, अनुमोदन गर्ने तयारीमा समिति (भिडियोसहित)

खोज पत्रिका बिहिबार, २०८० जेष्ठ ३२, ०८ :१५ बजे

काठमाडौं । संसदीय सुनुवाइ समितिबाट प्रस्तावित प्रधानन्यायाधीश हरिकृष्ण कार्कीको अनुमोदन गर्ने तयारी गरिएको छ । बुधबार उजुरीकर्ताको छलफलपछि बिहिबार बिहान ८ बजे सुनुवाइ समितिले कार्कीलाई सुनुवाइका लागि बोलाएको हो ।

समितिले बुधबार ७ जना उजुरीकर्तासँग एकल रुपमा र बाँकीसँग सामूहिक रुपमा छलफल गरेको थियो । कार्कीविरुद्ध ३८ जना उजुरीकर्ताले २९ उजुरी दर्ता गराएका थिए ।

गत वैशाख २५ गते संवैधानिक परिषद्को बैठकले प्रधानन्यायाधीशमा कायम मुकायम प्रधानन्यायाधीश कार्कीको नाम सिफारिस गरेको थियो । संसदीय सुनुवाइ समिति गठन नहुँदा कार्कीको संसदीय सुनुवाइ प्रक्रिया ढिलो भएको हो ।

आजको बैठकले कार्कीको नाम अनुमोदन गर्ने तयारी गरेको छ । उनी १९ दिनका लागि प्रधानन्यायाधीश बन्दैछन् । ६५ बर्षे उमेरहदका कारण साउन २० गते अवकाश पाउने कार्की एक महिनाअघि विदा बस्नुपर्ने ब्यवस्था रहेको छ ।