वडामा पहिलो पटक गाडी पुगेपछी गाउँमा नाचगान

खोज पत्रिका आइतवार, २०८० जेष्ठ ७, ०७ :१८ बजे

रुकुमपश्चिम । रुकुम पश्चिमको आठबिसकोट नगरपालिका वडा नम्वर १ सडक सञ्जालमा जोडिएपछि स्थानीयले खुशीयाली मनाएका छन् । जिल्लाकै विकट मानिने उक्त वडामा सडक सञ्जाल जोडिएपछि गाउँमा पहिलो पटक गाडि पुग्दा स्थानीयवासी खुसी भएका हुन ।

शनिवार वडा नम्वर १ मा पुगेका दुईवटा ट्याक्टर र डोजर पुगेपछि स्थानीयले चालक र जनप्रतिनिधिलाई फुलमालाले स्वागत गरेका छन् भने नाचगान गरेका थिए ।

यो क्षेत्रलाई सडक सञ्जालसँग जोड्न २०७८ सालमा सडक निर्माण सामग्री सहितको डोजर हेलिकोप्टरमार्फत ढुवानी गरिएको थियो ।

चट्टान क्षेत्र धेरै भएकाले दुई वर्षसम्म भीर फुटाउन नसक्दा वडा नम्वर १ र २ का नागरिक वडा नम्वर ३ हुँदै एक दिन पैदल हिडेर पालिका आउन बाध्य भएको वडाअध्यक्ष देव बहादुर घर्तीले जानकारी दिए । अब भने पालिका आउजाउ गर्न सहज भएको उनको भनाई छ ।