निरा पाण्डेको हत्या भएको १० दिनपछि पक्राउ परे विनोद, सुनको सिक्रीकै लागि हत्या !

काठमाडौं । काठमाडौंको कपनमा भाँडा पसल सञ्चालन गर्दै आएकी निरा पाण्डे आचार्यको हत्या आरोपमा प्रहरीले एकजनालाई पक्राउ गरेर सार्वजनिक गरेको छ । घटनाको १० दिनपछि प्रहरीले झापा धुलाबारीका विनोद विकलाई पक्राउ गरेर सार्वजनिक गरेको हो । प्रहरीको केन्द्रीय अनुसन्धान ब्युरो (सीआईबी) र उपत्यका अपराध अनुसन्धान कार्यालयको टोलीले झापा धुलाबारीका विकलाई पक्राउ गरेको हो ।

प्रहरीका अनुसार निराको हत्या गरेको पाँच दिनपछि उनी झापा पुगेका थिए । पक्राउ परेका विक विगतमा झापा र काठमाडौंको ठमेलका विभिन्न क्लबमा बाउन्सरको काम गर्ने गरेको खुलेको छ । प्रहरीका अनुसार विकले पाण्डेले लगाएको सुनको सिक्री लुट्न खोज्दा उनले प्रतिकार गरेपछि हत्या गरेको खुलेको छ ।

हत्या गर्ने क्रममा विकले आचार्यको पसलमै भएको चक्कु प्रयोग गरेका थिए । विकले हत्या गरेको चक्कु भने खोलामा फालेको बयान प्रहरीलाई दिएका छन् । प्रहरीले सिसिटिभी फुटेजको सहयोगमा हत्यारा पत्ता लगाउन सफल भएको जानकारी दिएको छ । प्रहरीका अनुसार हत्या स्वीकार गरेका विकमाथि थप अनुसन्धानको काम शुरु भएको छ । सीआइवी र उपत्यका अपराध अनुसन्धान कार्यालयको टोली झापा पुगेर शनिबार उनलाई काठमाडौं ल्याएको हो ।
कसरी गरे हत्या ?
प्रहरीका अनुसार हत्या आरोपी विक भक्तपुरको लोकन्थली बस्ने गरेको खुलेको छ । वैशाख ७ गते दिउँसो पौने ३ बजे पाण्डेको हत्या गरेर टेम्पो चढेर काठमाडौंको चावहिलनजिकसम्म आएका उनी मोटरसाइकल चढेर आफु बस्ने कोठामा पुगेका थिए । उनी बस्ने कोठाबाट प्रहरीले रगत लागेको सर्ट र एउटा झोला बरामद गरेको छ ।

घटनाको दिन विक लोकन्थलीबाट सात बजे बस चढेर चावहिल पुगेको र त्यहाँबाट पाण्डेको पसलमा पुगेका थिए । सुरुमा पसलमा गएर उनले भाँडाको मोलमोलाइ गरेका थिए । केही भाँडाहरु रोजिसकेपछि पैसा निकाल्ने बहानामा पसलबाट बाहिर निस्किएका उनी १०÷१५ मिनेटपछि दिउँसो पौने तिन बजे फेरि पसलमै पुगेका थिए ।

प्रहरीका अनुसार विकले निराले लगाएको सिक्रीका साथै पसलबाट ११/१२ सय रुपैयाँ लुटेका थिए । बिकले लुटेको सिक्री बालाजुको एक सुन पसलमा ५५ हजार रुपैयाँमा बिक्री गरेको र प्रहरीले उक्त सिक्रि समेत बरामद गरेको छ । उनीमाथि थप अनुसन्धान शुरु भएको र अनुसन्धानबाट थप कुरा खुल्दै जाने प्रहरीले जनाएको छ । घटनाको १० दिनसम्म पनि अभियुक्त पक्राउ गर्न नसकेको भन्दै पाण्डेका आफन्त र व्यवसायीहरुले काठमाडौंमा प्रदर्शन गर्दै आएका थिए ।

थप समाचार

राजनीतिमा आउने कुलमानको तयारी, उर्जामन्त्रीले अनावश्यक दुख दिएको आरोप

कार्यवाहक प्रधानमन्त्री सिंहले भेटे राष्ट्रपति पौडेल

७ दमकल प्रयोग गरेर नियन्त्रणमा लिइयो चन्द्रागिरिमा भएको आगलागी

साँखुको सलम्बुटारस्थित आश्रयस्थलमा टिपर छिर्‍यो, तीन जनाको मृत्यु

भिट्ठामोड सुख्खा बन्दरगाह निर्माणमा सहयोग गर्ने प्रचण्डको प्रतिबद्धता

हमासलाई ट्रम्पको चेतावनी‘बन्दी रिहा नगरेमा एउटा पनि सदस्य बाँकी रहने…