साढे तीन महिनामै ढल्यो गण्डकी प्रदेश सरकार, कांग्रेस–माओवादी सरकार बनाउने कसरतमा

खोज पत्रिका शनिबार, २०८० बैशाख ९, १९ :३९ बजे

काठमाडौं । गठन भएको १ सय ५ दिनमै गण्डकी प्रदेश सरकार ढलेको छ । चैत १० गते तत्कालिन सत्ता सहयात्री दल नेकपा माओवादी केन्द्रले सरकारलाई दिएको विश्वासको मत फिर्ता लिएपछि शनिबार मुख्यमन्त्री खगराज अधिकारीले विश्वासको मत लिएका हुन् । तर विश्वासको मतको पक्षमा २४ मत खस्यो भने विपक्षमा ३५ मत खस्यो ।

६० सदस्यीय प्रदेशसभामा सरकार गठनका लागि कम्तिमा ३१ सांसद आवश्यक हुनेमा एमाले र राप्रपाबाहेकका दलले अधिकारीलाई मत दिएनन् । बहुमत नपुगेपछि सरकार ढलेको हो । त्यसअघि विश्वासको मत माग्दै मुख्यमन्त्री अधिकारीले सरकार गठन हुने बेलाको सहमति कार्यान्वयन गर्न आग्रह गर्दै नेकपा माओवादी केन्द्रलाई मत दिन आग्रह गरेका थिए ।

जवाफमा नेकपा माओवादी केन्द्र गण्डकी प्रदेश संसदीय दलका नेता हरिबहादुर चुमानले केन्द्रमा भएको गठबन्धनअनुसार पनि प्रदेशमा एमालेलाई विश्वासको मत दिननसक्ने बताए । उनले विवाद प्रदेशमा नभई केन्द्रबाटै शुरु भएको र संघ सरकारमा समेत सत्ता गठबन्धन कांग्रेससँग गरेको भन्दै मत दिन नसक्ने बताए ।

नेकपा माओवादी केन्द्र र नेपाली कांग्रेसले मुख्यमन्त्री अधिकारीलाई विश्वासको मत नदिएसँगै मुख्यमन्त्री अधिकारी पदमुक्त भएका छन् । अब कांग्रेस संसदीय दलका नेता सुरेन्द्रराज पाण्डे गण्डकी प्रदेशको मुख्यमन्त्री बन्नेछन् । नेपाली कांग्रेस र नेकपा एमालेका बिचमा प्रदेश सरकारको नेतृत्व आलोपालो गर्ने सहमति जुटिसकेको छ ।