अलपत्र गौतमबुद्ध क्रिकेट रंगशाला अव सरकारले नै बनाउने

खोज पत्रिका सोमवार, २०७९ चैत्र २०, २० :२६ बजे

काठमाडौं । चितवनमा अलपत्र रहेको गौतमबुद्ध क्रिकेट रंगशाला सरकारले नै बनाउने निर्णय गरेको छ । धुर्मुस सुन्तली फाउन्डेसनद्वारा निर्माण सुरु भएको क्रिकेट रंगशाला आर्थिक अभावले लामो समयदेखि अलपत्र रहेको थियो ।

सोमबार बसेको मन्त्रिपरिषद बैठकले रंगशालाको स्वामित्व लिने विषयमा आवश्यक प्रक्रियामा जाने निर्णय गरेको हो । यससँगै रंगशाला निर्माणले निरन्तरता पाउने भएको छ । कलाकारद्वय सीताराम कट्टेल र कुन्जना घिमिरेले रंगशाला निर्माणको क्रममा लागेको १८ करोड ऋण तिर्न नसकेको भन्दै भरतपुर महानगरपालिकालाई जिम्मा लगाउँदै निर्माण रोकेका थिए ।

केही साताअघि फाउन्डेसनका संस्थापक कट्टेलले रंगशालाको स्वामित्व लिनका लागि सरकारलाई हारगुहार गरेका थिए । हालसम्म रंगशालाको प्यारापिटको पहिलो चरणको काम सकिएको बताइएको छ ।

तीन हजार दर्शक क्षमता भएको प्यारापिटका लागि २ सय ८६ वटा पिलर उठाउँदै चौरमा दुबो गाड्ने काम भइरहँदा निर्माण रोकिएको हो । ८ वटा पिचलगायतका काम बन्न बाँकी छ । कट्टेलले अहिलेसम्म उधारोमा काम गरेको र ५४ करोड खर्च भएकामा करिब १६ करोड रुपैयाँ उधारो भइसकेको बताएका थिए ।