किन छोड्दैछन् स्वर्णिम वाग्लेले कांग्रेस ?

खोज पत्रिका बिहिबार, २०७९ चैत्र १६, १६ :११ बजे

काठमाडौं । अर्थशास्त्री डाक्टर स्वर्णिम वाग्लेले कांग्रेस परित्याग गर्ने तयारी गरेका छन् । वाग्लेले नेता डा. शेखर कोइरालालाई म्यासेज लेख्दै आफू अब कांग्रेसमा रहन नसक्ने बताएका हुन् । उनी राष्ट्रिय स्वतन्त्र पार्टीका तर्फबाट तनहुँ– १ मा चुनाव लड्ने तयारीमा रहेको बताइएको छ ।

उनले म्यासेजमा लेखेका छन् ‘प्रिय शेखर दाइ, हजुरहरूको अपार सद्भावका बाबजुद म कांग्रेसमा रहन नसक्ने अवस्था आएको छ । देउवा–आरजू गिरोहको निरन्तर हेपाइ र अपमानले यो स्थिति ल्याएको हो । उनी मंसिर ४ गतेको चुनावमा चितवन–१ बाट प्रतिस्पर्धा गर्न खोजे पनि विश्व पौडेललाई टिकट दिइएको थियो ।

अर्थशास्त्री वाग्लेलाई रोक्न कांग्रेस महामन्त्री गगन थापा र विश्वप्रकाश शर्मा लागिपरे पनि उनले आफू कांग्रेस छाड्ने निर्णयमा पुगिसकेको सन्देश उनीहरूलाई पनि पठाएका छन् । राष्ट्रिय योजना आयोगका पूर्व उपाध्यक्ष समेत रहेका वाग्ले चर्चित अर्थशास्त्री हुन् । २०७९ साल मंसिरमा सम्पन्न चुनावका लागि कांग्रेसको घोषणापत्र लेख्ने टीममा उनी पनि थिए ।