राष्ट्रपतिको उम्मेदवारबारे छलफल गर्न बिहिबार उच्चस्तरीय संयन्त्रको बैठक

खोज पत्रिका बुधबार, २०७९ माघ २५, ११ :४३ बजे

काठमाडौं । प्रधानमन्त्री पुष्पकमल दाहाल प्रचण्ड र नेकपा एमालेका अध्यक्ष केपी शर्मा ओलीबीच भेटवार्ता भएको छ । बिहीबार उच्चस्तरीय राजनीतिक संयन्त्रको बैठक बोलाउने दुई नेताबीच सहमति भएको बताइएको छ । सोही बैठकमा राष्ट्रपतिको उम्मेदवारबारे छलफल हुनेछ ।

उच्चस्तरीय राजनीतिक संयन्त्रको संयोजकसमेत रहेका ओलीलाई भेट्न प्रधानमन्त्री प्रचण्ड बिहान ओली निवास बालकोट पुगेका थिए । सोही भेटवार्तामा बिहीबार राजनीतिक संयन्त्रको बैठक बोलाउने र राष्ट्रपतिको उम्मेदवारबारे छलफल गर्ने प्रधानमन्त्री प्रचण्डले जानकारी दिए ।

बालकोटबाट बाहिरिने क्रममा प्रचण्डले भने, ‘सहज ढंगले कसरी अघि बढ्ने भन्नेबारे उच्चस्तरीय राजनीतिक संयन्त्रको बैठकमा छलफल गर्छौं, राष्ट्रपतिको उम्मेदवारबारे पनि छलफल हुन्छ ।’ राष्ट्रपति पदको निर्वाचन आगामी फागुन २५ गते हुँदैछ । तर, सत्ता साझेदार दलबीच नै राष्ट्रपतिको उम्मेदवारबारे एक मत छैन ।