शिक्षाको गुणस्तर सुधार्न तीनै तहका सरकार लाग्नुपर्छः प्रदेश सभा सदस्य घिमिरे

खोज पत्रिका शनिबार, २०७९ माघ १४, १९ :२३ बजे

अर्घाखाँची । लुम्बिनी प्रदेश सभा सदस्य रामजीप्रसाद घिमिरेले शिक्षाको गुणस्तर सुधार गर्न तीनै तहका सरकार लाग्नुपर्नेमा जोड दिएका छन् ।

जिल्लाको पाणिनि गाउँपालिका–५ मा रहेको भानु माध्यमिक विद्यालय मैदानको शिक्षक सम्मान तथा बिदाई कार्यक्रममा घिमिरेले गुणस्तरीय शिक्षा आजको आवश्यकता रहेको बताएका हुन ।

घिमिरेले मुलुकको समग्र विकासका लागि पहिले शिक्षामा सुधार गर्नुपर्ने औँल्याउँदै शिक्षा सुधारमा प्रदेश सरकार गम्भीर रहेको उल्लेख गरे । उनले मुलुकको समग्र विकासको लागि पहिलो कुरा शिक्षामा सुधार गर्नुपर्छ भन्दै उनले भने शिक्षाको गुणस्तर सुधारमा प्रदेश सरकार गम्भीर छ ।

उनले स्रोत र साधनको अभावका बिच पनि सामुदायिक विद्यालयको नतिजा सन्तोषजनक रहेको स्पष्ट पारे । विद्यार्थीलाई पढ्दै कमाउँदै खालको वातावरण सिर्जना गर्न उनले पालिकालाई सुझाव समेत दिए ।