गण्डकी प्रदेशका सांसद दीपक मनाङे नेकपा एसमा प्रवेश,माधव नेपालले गरे स्वागत

खोज पत्रिका सोमवार, २०७९ मंसिर १९, २० :०८ बजे

काठमाडौं । गण्डकी प्रदेशसभा सदस्य राजीव गुरुङ अर्थात् दीपक मनाङे नेकपा एकीकृत समाजवादी पार्टीमा प्रवेश गरेका छन् । गण्डकी प्रदेश सभा सदस्यमा निर्विरोध निर्वाचित भएका मनाङेले एक विज्ञप्ति जारी गर्दै एकीकृत समाजवादीमा प्रवेश गरेको जनाएका हुन् । उनलाई नेकपा एसका अध्यक्ष माधव कुमार नेपालले पार्टीमा स्वागत गरेका थिए ।

आफ्नो विचार र सिद्धान्त मिल्ने भएकाले एकीकृत समाजवादीलाई रोजेको उनको भनाई छ । पूर्वप्रदेश मन्त्री मनाङेले मनाङ– प्रदेशसभा २ बाट स्वतन्त्र उम्मेदवारी दिएका थिए । अर्का उम्मेदवार दोर्जे लामा गुरुङले नाम फिर्ता लिएपछि मनाङे निर्विरोध निर्वाचित भएका थिए ।

नेकपा एमाले, नेपाली कांग्रेस, नेकपा माओवादी केन्द्र लगायतका कुनै पनि दलले मनाङे विरुद्ध उम्मेदवारी दिएका थिएनन् । स्वतन्त्र रूपमा काम गर्ने निर्णय गरे पनि अहिलेको परिवर्तित परिस्थितिमा एक्लै रहनुभन्दा राजनीतिक पार्टीको संगठनमा आबद्ध भएर गरिने पहलकदमीले काम प्रभावकारी हुने निष्कर्षमा पुगेको उनले बताए ।