स्वतन्त्र उम्मेद्वारले गरे सत्ता गठबन्धनका उम्मेद्वारलाई प्रचार–प्रसारमा अवरोध

खोज पत्रिका बिहिबार, २०७९ कार्तिक १७, २० :५८ बजे

काठमाडौं । रुकुमपूर्व प्रदेश ‘१’ मा नेकपा माओवादी केन्द्रबाट बिद्रोह गरी स्वतन्त्र उम्मेदवारी दिएका सुरुल पुनमगर (अजयशक्ति) र सोही क्षेत्रमा नेपाली काग्रेसबाट बिद्रोह गरी स्वतन्त्र उम्मेद्धार दुतकुमार पुन (गुमाने) का समर्थकले सत्ता गठबन्धका उम्मेद्धार र नेताहरुलाई जिल्लाको माथिल्लो क्षेत्र पुथाउत्तरगंगा गाउँपालिका जानबाट रोकिएको हो ।

बाम–लोकतान्त्रिक गठबन्धनका तर्फबाट प्रतिनिधिसभाका उम्मेद्धार बनेका माओवादी केन्द्रका पूर्णबहादुर घर्ती सहित नेपाली कांग्रेसका समानुपातिक उम्मेदवार केशरमान रोका लगायत माओवादी केन्द्रका नेताद्धय गणेशमान पुन र दलजित सिर्पाली सहितको टोलीलाई अवरोध गरिएको हो ।

स्वतन्त्रका समर्थकले उक्त टोलीलाई भूमे गाउँपालिका २ काँक्री देखि तकसेरा जाने सडक खण्ड अन्र्तगत काँक्री देखी १ किलोमिटर माथि बिच बाटोमा रोकेको हो । गठबन्धनको टिम अहिले फर्किएर खावाङबगरमा पुगेको छ । त्यहाँ दुई पक्षिय छलफल चलिरहेको र समाधान निकाल्ने भइरहेको बताइएको छ ।

अवरोध गर्ने स्वतन्त्रका समर्थकले आफुहरुको विरोध गठबन्धनका प्रदेश सभा १ का उम्मेदवार तेजबहादुर ओली प्रति मात्रै रहेको बताएका छन् । टोलीले प्रतिनिधि सभाका उम्मेदवार पूर्णबहादुर घर्तीलाई समर्थन रहेको बताएको छ । ओली सहितको टिमलाई यसअघि पनि अवरोध गरिएको थियो ।